काठमाडाैं – विश्वकप फुटबलमा जर्मनी र जापान प्रतिस्पर्धा गर्दैछन् । विश्वकप फुटबलमा सर्वाधिक सफल जर्मनीविरुद्ध एसियन पावर हाउस जापान मैदानमा उत्रिँदा स्वाभाविक रूपमा खेल प्रतिस्पर्धात्मक हुने आँकलन गरिएको छ ।
विश्वकपमा बुधबार पावर हाउस जापानविरुद्ध खेल्दै जर्मनीले विश्वकपको सुरुवात गर्दा संयमित हुनेछ । समूह ‘इ’मा रहेको जर्मनी र जापानबीचको खेल साँझ ६:४५ मा सुरु हुनेछ ।
खालिफा अन्तर्राष्ट्रिय स्टेडियममा जापानविरुद्ध मैदान उत्रिँदा जर्मनीलाई अघिल्लो संस्करणको खराब प्रदर्शनलाई बिर्साउने चुनौती रहनेछ । त्यसैले जर्मनी पहिलो खेलमा नै ३ अंकका लागि प्रतिस्पर्धा गर्नेछ ।
२०१८ को रुस विश्वकपमा जर्मनी समूह चरणबाटै बाहिरिएको थियो । त्यसैले यो पटक ४ वर्षअघिको खराव विरासत विर्सन पनि जर्मनी जापानविरुद्ध जित निकाल्न चाहन्छ । जापानले १९९८ बाट विश्वकपमा डेब्यु गरेको थियो। त्यसयता जापान हरेक संस्करणको विश्वकप खेल्दै आइरहेको छ ।
रुस विश्वकपमा समेत जापानले उत्कृष्ट प्रदर्शन गरेको थियो । जापानले समूह चरण पार गरेको थियो । यस पटक पनि जापान पुरानो बिरासतलाई जोगाउने योजनामा रहेको छ । जर्मनीविरुद्ध मैदान उत्रिँदा जापान पनि साउदी अरेबियाले जस्तै सरप्राइज जित चाहन्छ ।
जर्मनी र जापानबीच यसअघि दुई पटक प्रतिस्पर्धा भएको छ । जसमा सन् २००४ मा जर्मनीले जापानलाई ३-० ले पराजित गर्दा सन् २००६ मा भने जर्मनी र जापानबीच २-२ गोलको बराबरी भएको थियो ।
फिफा विश्वकपमा भने यी दुई टिमबीच पहिलो पटक प्रतिस्पर्धा हुन लागेको हो ।
