काठमाडौं – नायिका करिष्मा मानन्धरले न्यायका लागि अनसन बसिरहेकी महोत्तरीकी निहारिका राजपुत र उनका छोराको लालनपालनका लागि आफू तयार रहेको बताएकी छन् । निहारिकाले आफ्नो प्रस्ताव स्वीकार गरे आफ्ना दुईवटी छोरी भएको आफूले महसूस गर्ने करिष्मा बताउँछिन् ।
आफ्नी छोरी (कविता)भन्दा कम उमेरकी निहारिका समस्यामा रहेको र उनका लागि आफू सहारा बन्न चाहेको उनले स्पष्ट पारिन् । “मेरो छोरीभन्दा पनि कम उमेरकी निहारिका अहिले न्यायका लागि अनसन बसिरहेकी छन् । उनलाई मैले म सहयोग गर्छु भनेको छु,” करिष्मा भन्छिन्, “उनको समस्याका लागि सबैले आवाज उठाउनुपर्छ । म मेरोतर्फबाट सहयोग गर्छु । उसलाई म छोरी सरह बनाएर राख्छु । उनको बच्चालाई राख्छु । न्यायसँगै उसको लालनपालन र शिक्षा पनि ठूलो कुरा हो, यो गर्न म तयार छु ।”
करिष्माले आफूले सांसदहरूलाई पनि उनको न्यायका लागि आवाज उठाउन भनेको जानकारी दिइन् । करिष्माले निहारिकालाई आर्थिक सहयोग पनि गरेकी छन् ।
“मेरो एउटा छोरी थियो, तिमी भयो भने दुईटा हुन्छ । बच्चा लिएर घर आउ, म छु,” करिष्माले सामाजिक संजालमा लेखेकी छन् ।
न्यायको माग गर्दै वसन्तुपरमा अनसन बसिरहेकी निहारिकाको २१ महिनाको बच्चा छ । करिष्माले अनसन बसेर आफ्नो स्वास्थ्यलाई कमजोर बनाएरभन्दा स्वस्थ भएर न्यायका लागि लड्न सुझाव पनि दिएकी छन् ।
