काठमाडौं – जेठको पहिलो सातामा रिलिज हुने भनेर स्थगित भएको चलिचत्र ‘सम्झना-बिर्सना’ को नयाँ प्रदर्शन मिति तय गरिएको छ । निर्माता अद्वितीय प्रधानले सम्झना–बिर्सना अब असार ३१ मा रिलिज गरिने जानकारी दिएका छन् ।
स्थानीय चुनावको परिणामले चलचित्रको व्यापार बिग्रने भन्दै जेठ ६ मा यो चलचित्र प्रदर्शनी स्थगित गरिएको थियो । अब यो चलचित्र ३१ असारमा देशभरका सिनेमा हलमा रिलिज गरिने भएको छ ।
पूजा शर्मा र आकाश श्रेष्ठ प्रमुख भूमिकामा रहेको चलचित्रको निर्देशन निमेष प्रधानले गरेका हुन् । रेबिका प्रधान निर्माता रहेको चलचित्रमा पूजा,आकाशका साथमा सुनील थापा, छुल्ठिम गुरुङ र शिसिर राणाको अभिनय छ ।
शिब ढकालले खिचेको चलचित्रका गीतमा राजन इशान र सुदर्शन तामाङको संगीत अनि कमल राईको कोरियोग्राफी र तारा थापा ‘किम्भे’ को सम्पादन छ । आदित्य फिल्म्स्को प्रस्तुति रहेको फिल्मको क्रिएटिभ हेड स्व.बिशारद बस्नेत हुन् । चलचित्रको यसअघि ‘परेलीमा लुकाउछु’ बोलको गीत दर्शकमाझ आइसकेको छ ।
दार्जिलिङ,सिल्गुढी र सिक्कीमका रमणीय स्थानमा खिचिएको चलचित्र आरआर फिल्मस्ले बितरण गर्दैछ । निर्देशक निमेषकै कथा,पटकथा रहेको चलचित्रको सम्वाद लेखनमा उनलाई अभिनेता राणाले सघाएका छन् ।
‘रिल’ र ‘रियल’ दुवैमा जमेको जोडीका रुपमा चर्चित पूजा र आकाशलाई दर्शकले अब यही चलचित्रमा संगै हेर्न पाउने छन् । आफूहरुले निकै मिहीनेतका साथ अभिनय गरेकाले बिगतमा झै यो चलचित्रबाट पनि दर्शकको अपार साथ र माया पाउने बिश्वास पूजा-आकाशको छ ।
