काठमाडौं – रिलिज भएको दिनबाटै कीर्तिमानी व्यापार गरिरहेको चलचित्र कबड्डी– ४ ले चार दिनमा १० करोड ग्रस कलेक्सन गरेको छ । यो नेपाली चलचित्रमा सबैभन्दा छिटो १० करोड कमाउने अर्को ठूलो कीर्तिमान हो ।
गत शुक्रबार रिलिज भएको फिल्मले तीन दिन लगातार हाउसफुलको व्यापार गरेको थियो । सोमबारदेखि रफ्तार केही कम भए पनि फिल्ममा दर्शकको आकर्षण घटेको छैन । पाँच दिनमा फिल्मले अनुमानित १३ करोड रुपैयाँ कलेक्सन गरेको फिल्मका वितरक गोविन्द शाहीले बताए ।
पहिलो दिन चलचित्रले साढे तीन करोड कमाएर कीर्तिमान राखेको थियो । नेपालमा कुनै पनि स्वदेशी वा विदेशी चलचित्रले यति ठूलो ओपनिङ गरेका थिएनन् । दोस्रो र तेस्रो दिनमा पनि फिल्मको व्यापार उचाइमै रह्यो ।
शनिबार फिल्मले ३ करोड १५ लाख र आइतबार २ करोड ९५ लाख रुपैयाँ कमाएको शाही बताउँछन् । यसरी तीन दिनमै फिल्मले ९ करोड ६० लाख रुपैयाँ बटुल्न सफल भयो ।
चौथो दिन सोमबार फिल्मले दुई करोडको व्यापार गर्यो । मंगलबारको विवरण आइनसकेको तर अनुमानित एक करोड ८० लाख रुपैयाँको व्यापार गरेको शाहीले बताए । यसरी फिल्मले पाँच दिनमा १३ करोडभन्दा बढी कलेक्सन गरेको देखिन्छ ।
रामबाबु गुरुङ निर्देशित कबड्डी– ४ करिब तीन करोड रुपैयाँको लागतमा निर्माण भएको हो । यो चलचित्रले डिजिटल राइट्स र ओभरसिज राइट्स बेचेर रिलिज अगावै आफ्नो लगानी सुरक्षित गरेको थियो । रिलिजपछि हलहरुबाट हुने आम्दानी सबै निर्माताको मुनाफा हो ।
कबड्डी– ४ का मिडिया कोअर्डिनेटर दिनेश सिटौलाका अनुसार पहिलो हप्तामा फिल्मले हलहरुबाट गर्ने ग्रस कलेक्सनको ५० प्रतिशत सेयर निर्माताले पाउने सहमति छ । यस हिसाबले अहिलेसम्म निर्माता मणिराम पोखरेलले झण्डै ७ करोड रुपैयाँ मुनाफा कमाइसकेका छन् ।
व्यापारको गतिमा तिव्र गिरावट आएन भने उनले अझै केही करोड मुनाफा थप्नसक्ने देखिन्छ । आउँदो शुक्रबार कुनै पनि नेपाली फिल्म रिलिज नभएकाले शनिबार र आइतबार पनि फिल्मको ब्यापारमा बढोत्तरी हुनसक्छ ।
