काठमाडौं – म्याग्दीको बेनीमा ३ करोड २५ लाख रुपैयाँ खर्चेर रावण पार्क बनाइने भएको छ । बेनी नगरपालिकाले संस्कृति, पर्यटन तथा नागरिक उड्डयन मन्त्रालयको सहयोगका बेनी नगरपालिका-५, पुलाको पछैमा रावण पार्क बनाउन लागेको हो ।
रावणको जन्म हालको बेनीमा पर्ने भूमिमा भएको पौराणिक ग्रन्थहरूमा उल्लेख भएको पाइन्छ । पुराणमा उल्लेख भएअनुसार रावण पुलस्ते ऋषिका नाति हुन् भने विभष्भा ऋषिका छोरा हुन् । पुलस्ते ऋषि सपरिवार ध्यान गर्न बेनी आइपुगेको किंवदन्ती छ । सोही क्रममा रावणको जन्म भएको मानिन्छ ।
१० वटा टाउको भएका रावणको जन्म भएकोले उक्त क्षेत्रमा अद्भुत शक्ति भएको स्थानीयको दाबी छ । ‘यज्ञस्थल, सुत्केरी स्याहार केन्द्र बनाइएको छ । नाभि गाडेको ढुङ्गा छ,’ स्थानीय कृष्ण बानियाँले भने, ‘रावण हुर्केपछि मात्रै लंकामा राजा बनेको पुराणमा पढ्न पाइन्छ । त्यसैले यो ठाउँको महत्त्व बढी छ ।’
बेनी नगरपालिकाका इन्जिनियर विमलरञ्जन कार्कीकाअनुसार रावणको मूर्तिसहित पार्क निर्माणका लागि मन्त्रालयले २ करोड ११ लाख रुपैयाँ र नगरपालिकाले १ करोड १४ लाख खर्च बेहोर्ने छ । पार्कमा रावणको ६ मिटर अग्लो मूर्तिसमेत बनाइने भएको छ । पुलहाश्रममा रहेका ऋषिमुनि मन्दिर, हवन कुण्डलगायतका संरचनालाई संरक्षण गरी पार्क बनाउने योजना रहेको इन्जिनियर कार्कीको भनाई छ ।
पर्यटन मन्त्रालयले पर्यटन पूर्वाधार तथा पर्यटन उपज विकास साझेदारी कार्यक्रमअन्तर्गत पार्क निर्माणका लागि बजेट छुट्याएको हो । नगरपालिकाले पार्क निर्माणका लागि धर्म एस कास्यप जेभी कलंकी काठमाडौँसँग ठेक्का सम्झौता गरिसकेको छ । पार्क ०७९ फागुनमा निर्माण पूरा गर्ने सम्झौतामा उल्लेख छ । उक्त कम्पनीले १ करोड ७६ लाख ७७ हजार ५ सय ६३ रुपैयाँ कबोल गरी ठेक्का सम्झौता गरेको हो ।
‘हामीले तयार पारेको गुरुयोजनाअनुसार पर्यटन मन्त्रालयबाट रावण पार्क निर्माण गर्न बजेट प्राप्त भई साझेदारी कार्यक्रमअन्तर्गत ठेक्का लागिसकेको छ’ बेनी नगरपालिकाका इन्जिनियर विमलरञ्जन कार्कीले भने, ‘रावण पार्क निर्माण थालनी भएसँगै नगरपालिकाले पहुँच मार्गको स्तर उन्नत गर्ने, कालोपत्रे गर्न बजेट विनियोजन गरेका छौँ । अपुग बजेट संघ तथा प्रदेश मन्त्रालयमा आग्रह गरेका छौँ ।’
पार्क निर्माणको ठेक्का एस कस्यप जेभी काठमाडौँले पाएको छ । ‘बिस फिटको रावणको १० टाउका भएको पित्तलको मूर्ति बन्ने छ । हवन कुण्ड, नाभि गाडेको ठाउँ समेत व्यवस्थित हुनेछ,’ इन्जिनियर कार्कीले भने, ‘यो वर्ष नसकिएको काम क्रमगत रूपमा हुँदै जान्छ ।’
बेनीका मेयर हरिकुमार श्रेष्ठकाअनुसार २०७९ फागुनमा काम सक्ने गरी कम्पनीले १ करोड ७६ लाख ७७ हजारमा ठेक्का लिएको हो । त्यस ठाउँमा जाने सडक कालोपत्रेका लागि पनि बजेटको व्यवस्था गरिएको मेयर श्रेष्ठले बताए । डीपीआर बनाएरै निर्माणको प्रक्रिया सुरु भएको उनको भनाई छ ।
