काठमाडाैं – बहुराष्ट्रिय कम्पनी बोटलर्स नेपालले झण्डै ४ अर्ब कर छली गरेको आरोपमा राजस्व अनुसन्धान विभागले अदालतमा मुद्दा दायर गरेको छ । कम्पनीले ३ अर्ब ७१ करोड ८१ लाख ५० हजार ४११ रूपैयाँ राजश्व छली गरेको अभियोग लगाउँदै विभागले शुक्रबार उच्चअदालत पाटनमा मुद्दा दायर गरेको हो ।
विभागको आरोप पत्रअनुसार कोकाकोला साब्को र यूरोपियन रिफ्रेसमेन्टबीच सेयर कारोबार हुँदा बोटलर्स नेपाल लिमिटिडको प्रतिकित्ता सेयरको स्वतन्त्र बजार मूल्य तीन हजार ८८३ थियो । सोमा कोकाकोला साब्कोको प्रतिकित्ता सेयर खरिद मूल्य ५३६ लाई लागतको रूपमा घटाउँदा हुन आउने रकम ३ हजार ३४७ प्रतिकित्ता पुँजीगत लाभ हुने अनुसन्धानबाट पुष्टि भएको विभागको भनाइ छ ।
सोही आधारमा कोकाकोला साब्को एसियाको बोटलर्स नेपालमा रहेको सेयर संख्या १४ लाख ८४ हजार ३०१ को बिक्री वापत जम्मा चार अर्ब ९६ करोड ७९ लाख ५५ हजार ४४७ पूँजीगत लाभ कायम हुने विभागले जनाएको छ ।
विभागले जारी गरेको विज्ञप्तीमा भनिएको छ- ‘आयकर ऐन, २०५८ को अनुसूची १ को दफा २(१) बमोजिम २५ प्रतिशतका दरले हुने तीन करोड ४१ लाख ९५० रूपैयाँ र दफा ११८ बमोजिम ब्याज १५ प्रतिशतका दरले हुने ९ करोड ७८ लाख ६ हजार ६२२ रूपैयाँ र दफा ११९ बमोजिमको ब्याज १५ प्रतिशतका दरले हुने एक अर्ब १० करोड २२ लाख ६५ हजार ११५ रूपैयाँ र दफा १२० (ख)बमोजिमको शुल्क एक अर्ब २४ करोड १९ लाख ८८ हजार ८६२ रूपैयाँ समेत गरी कुल बिगो तीन अर्ब ७१ करोड ८१ करोड ५० लाख ४११ रूपैयाँ हुन्छ ।’
राजश्व चुहावट –अनुसन्धान तथा नियन्त्रण ऐन, २०५२ को दफा २ को उपदफा (छ १) बमोजिमको बिगो बराबरको राजस्व चुहावट भएको अनुसन्धानबाट पुष्टि भएको भन्दै विभागले उच्च अदालत पाटनमा मुद्दा दायर गरेको हो ।
विभागले बालाजु औद्योगिक क्षेत्रस्थित बोटलर्स नेपाल लिमिटेड, कम्पनीका सञ्चालक समितिमा रहेका रहेका संयुक्त अरब ईमिरेट्सको दुबईस्थित कम्पनी कोका कोला साउथबेष्ट होल्डिङ लिमिटेडको कोका कोला साब्को एसियाको तर्फबाट प्रतिनिधित्व गर्ने चेयरम्यान शुक्ला वासन लगायतका १७ जनाविरुद्धमा मुद्दा दायर गरेको हो ।
यो कर छलीबारे पत्रकार गजेन्द्र बुढाथोकीले न्युज कारोबार अनलाइन र टक्सार म्यागेजिनमा कर छलि भएको खुलासा गरेका थिए ।
