१३ चैतदेखि नेपाल एयरलाइन्सले काठमाडौं-मुम्बई उडान पुनः सुरु गर्ने

काठमाडौं – नेपाल एयरलाइन्सले १३ चैतदेखि भारतको मुम्बईमा नियमित उडान पुनः सुरु गर्ने भएको छ । कोभिड-१९ महामारी सुरु भएपछि पछिल्लो दुई वर्षयता हवाई उडान बन्द रहेको यो रुटमा १३ चैतदेखि पुनः उडान सुरु गर्न लागेको नेपाल एयरलाइन्सले जनाएको छ ।

नेवानिले यो रुटमा साताको तीन वटा उडान गर्ने भएको छ । काठमाडौं-मुम्बई-काठमाडौं रुटमा बुधबार, शुक्रबार र आइतबार जहाज उड्नेछ । नेपाल एयरलाइन्सले अहिले नयाँ दिल्लीमा नियमित उडान गरिरहेको छ ।

कोरोना महामारी कम भएपछि वायुसेवा कम्पनीहरुको गुमेको बजार पुनर्स्थापित हुने क्रममा रहेको छ । निगमले नयाँ दिल्लीमा समेत दैनिक दुई जहाज उडान गर्ने घोषणा गरिसकेको छ ।