टोकियो – अर्घाखाँची समाज जापानले पाठेघरको क्यान्सर पीडित महिलालाई आर्थिक सहयोग गरेको छ । अर्घाखाँचीको पाणिनी गाउँपालिका -३ फ्रसवा निवासी विमला गौतमलाई २ लाख ४ हजार ५५ येन सहयोग गरिएको हो ।
समाजका कोषाध्यक्ष टोप बहादुर घर्तीमगरको संयोजकत्व र दिल प्रसाद श्रेष्ठको सह-संयोजकत्वमा अभियान सञ्चालन गरेको थियो । अर्घाखाँची समाज जापानको विशेष पहल रहेको अभियानमा जापानमा रोजगारी गर्दै आएका विभिन्न क्षेत्रका व्यक्तित्वबाट उक्त रकम संकलन गरिएको समाजका अध्यक्ष दीपक थापाले जानकारी दिए ।
संकलित रकम नेपाल पत्रकार महासंघ अर्घाखाँचीका सचिव विनोद गैरेमार्फत विमला गौतमको घरमै पुगेर हस्तान्तरण गरिएको हो । समाजले आफ्नो स्थापनाकालदेखि नै जिल्लामा समस्या पर्दा सहयोग गर्दै आएको छ । यो पटक पनि बिरामी विमलाको आर्थिक अवस्था नाजुक भएकोले सहयोग अभियान सञ्चालन गरिएको अध्यक्ष थापाको भनाई छ ।
हस्तान्तरण कार्यक्रममा बोल्दै वडा अध्यक्ष देव बहादुर केसीले विमलाको उपचारको लागि वडाबाट हुने हरेक सहयोग गर्न तत्पर रहेको बताएका थिए । रकम हस्तान्तरण गर्दै नेपाल पत्रकार महासंघका सचिव गैरेले सहयोग गर्ने सम्पूर्णप्रति आभार प्रकट गरे । कार्यक्रमका ग्लोबल आईएमई बैंक अर्घाखाँचीका शाखा प्रमुख प्रल्हाद न्यौपाने, मुमाराम गैरे समेतको उपस्थिति रहेको थियो ।
