काठमाडौँ – माइक्रोसफ्ट एप्पललाई पछि पार्दै बजार पुँजीकरणको आधारमा विश्वको सबैभन्दा मूल्यवान् कम्पनी बनेको छ। शुक्रबार माइक्रोसफ्टको शेयरको भाउ २.२ प्रतिशत बढ्सँगै माइक्रोसफ्टको बजार पुँजीकरण २४ खर्ब ९० अर्ब डलर पगेको हो। जबकी एप्पलको शेयर भाउ भने शुक्रबार १.८ प्रतिशतले घटेको थियो। एप्पलको बजार पुँजीकरण २४ खर्ब ६० अर्ब डलर छ। माइक्रोसफ्टले विभिन्न व्यवसायका लागि आफ्नो फरक फरक उत्पादन ल्याइरहेकाले आगामी दिनमा पनि यो कम्पनीको शेयरको भाउ बढ्न सक्ने विश्लेषकहरुले बताएका छन्।
गत जुन महिनामा माइक्रोसफ्ट २० खर्ब डलरभन्दा धेरै बजार पुँजीकरण भएको कम्पनी बनेको थियो। माइक्रोसफ्ट यो कोशेढुङ्गा पार गर्ने दोस्रो अमेरिकी कम्पनी हो। माइक्रोसफ्टले पछिल्लो समय मेसिन लर्निङ र क्लाउड कम्प्युटिङजस्ता प्रविधिमा लगानी गरिरहेकाले दीघकालीनरुपमा कम्पनीको निरन्तर वृद्धि हुने एक आकलनले देखाएको थियो। त्यसैले पनि लगानीकर्ताहरुमा यो कम्पनीप्रति आकर्षण देखिएको हो।
