काठमाडौं – हालै सार्वजनिक भएको आईओएस १५ मा स्वतः फाइल डिलिट हुने गम्भीर सुरक्षा कमजोरी देखिएको छ । पछिल्लो रिपोर्टअनुसार आईक्लाउडमा ब्याकअप राखिएका फोटोहरू प्रयोगकर्ताको मोबाइलबाट स्वतः डिलिट हुने समस्या देखिएको हो ।
म्यासेजेज एप सहितको आईओएस १५ र आईक्लाउड ब्याकअपबीचको अन्तरक्रिया हुँदा यस्तो समस्या देखिएको म्याक रुमर्सले उल्लेख गरेको छ । यदि प्रयोगकर्ताले म्यासेजेज थ्रेडबाट फोटोहरू सेभ गरेको छ र एकपछि अर्को थ्रेड डिलिट गर्ने गरेको छ भने अर्कोपटक आईक्लाउड ब्याकअपले त्यस्ता फोटो स्वतः डिलिट गरिदिने गरेको छ ।
यसको अर्थ फोटो लाइब्रेरीमा सुरक्षित रुपमा सेभ भएको देखिने फोटो कहिलेकाहीँ निश्चित समयपछि आफैँ डिलिट भइदिन सक्छ । यस्तोमा ब्याकअप राखेको ठानिएका फोटो समेत आईफोनबाट गायब हुनसक्छन् ।
एप्पलको तर्फबाट यो बग फिक्स नहुञ्जेलसम्म आफूले सुरक्षित राख्न चाहेको कुनै फायल अन्यत्र सेभ भएको सुनिश्चित नगरी त्यस्तो फोटो रहेको म्यासेज थ्रेड्स डिलिट नगर्नुहोस् । यदि तपाईंले आफ्नो म्यासेज थ्रेडबाट केही चिज हटाइसक्नु भएको छ भने त्यसभित्र रहेको फोटोको अतिरिक्त प्रतिलिपि बनाएर ब्याकअप राख्न नभुल्नुहोस् ।
