काठमाडौं – भारतको कोरोना संक्रमणको दर घट्न थालेको छ । दोस्रो लहर सुरु भएको करिब २ महिनापछि एक सातासम्म लगातार थपिने संक्रमितको संख्यामा गिरावट आइरहेको छ ।
पछिल्लो पटक ६ मेमा सबै भन्दा धेरै ४ लाख १४ हजार भन्दा धेरै संक्रमित थपिएका थिए । त्यसपछि हरेक दिन नयाँ संक्रमितको संख्या कम हुँदै गएको छ । पिसिआर परीक्षणको संख्या भने उत्तिकै रहेको भारतीय मिडियाले जनाएका छन् ।
पहिलो लहरमा कुल परीक्षणमा पोजेटिभ रिपोर्ट आउनेको संख्या भारतमा ५-६ प्रतिशत मात्रै रहेकोमा दोस्रो लहरमा २२ प्रतिशतसम्म भन्दा माथि पुग्यो । कुनै राज्यमा त ४० प्रतिशतसम्म पनि पुगेको थियो । अहिले त्यो दर घटेर २० प्रतिशत हाराहारी आएको भारतीय मिडियाले जनाएका छन् ।
भारतीय मिडियामा आएका खबर अनुसार दोस्रो लहरबाट आक्रान्त बनेका महाराष्ट्र, केरल कर्नाटक, उत्तर प्रदेश लगायतमा संक्रमणको दर ओरालो लागेको छ । दोस्रो लहरको पिक अवस्थामा पुगेर ओरालो लागेको अनुमान गरिएको छ ।
