काठमाडौं – काठमाडौंको थापाथलीस्थित नर्भिक अस्पतालले अक्सिजन आपूर्ति सहज नभए अकल्पनीय र भयावह अवस्था भोग्नु पर्नेमा सचेत गराएको छ । अस्पतालका कार्यकारी निर्देशक राजेन्द्रबहादुर सिंहले बुधबार प्रेस विज्ञप्ति जारी गर्दै कोटाअनुरुपको अक्सिजन पनि उपलब्ध हुन नसकेको बताएका छन् ।
उनले भनेका छन्, ‘पछिल्लो अवस्थामा कोभिडको संक्रमण बढेसँगै अस्पतालमा प्राण वायुको रूपमा रहेको अक्सिजनको अभाव चरम बन्दै गएको छ । राज्यको अनुदार नीतिले झन समस्यालाई बल्झाएको छ र तोकिएको कोटाअनुसार अक्सिजन समेत उपलब्ध हुन सकेको छैन । यो अवस्था यसैगरी जारी रहने हो भने अकल्पनीय घटना घट्न सक्ने अनुमान सहजै गर्न सकिन्छ ।’
निर्देशक सिंहले कोभिड-१९ को दोस्रो लहरको तीव्र संक्रमणपछि उत्पन्न जटिल परिस्थितिमा सर्वसाधारणलाई सहज उपचार दिने उद्देश्यले नर्भिक इन्टरनेशनल हस्पिटलले आफूलाई ‘कोभिड अस्पताल’ को रुपमा रुपान्तरण गरी सेवा प्रदान गरेको पनि बताएका छन् ।
असहज अवस्था भए पनि उपलब्ध सीमित साधन स्रोतको उच्चतम उपयोग गरी बिरामीहरुको उपचार सेवामा कुनै कमी नरहोस् भनेर अस्पताल प्रयत्नशील रहेको पनि उनले बताएका छन् ।
