टोकियो – कोभिडविरुद्धको फाइजर र एनबायोटेकको खोपको पहिलो खेप (लट) शुक्रबार जापान आइपुगेको छ । स्वास्थ्य मन्त्रालयले अमेरिकी औषधि कम्पनी फाइजर इंक द्वारा विकसित कोरोनाभाइरस खोपको आइतवार औपचारिक स्वीकृति लिएर अघि बढ्ने योजना बनाएको जापानी सञ्चारमाध्यमहरुले जनाएका छन् ।
संयुक्त राज्य अमेरिका, सिंगापुर र विश्वका अन्य भागहरूमा लगाउन सुरु भइसकेको फाइजरको खोप कम्पनीले जापानमा प्रयोग गर्न स्वीकृतिका लागि डिसेम्बरमा आफ्नो आवेदन दिएको थियो ।
सरकारी स्वास्थ्य प्यानल शुक्रबार रातीको बैठकमा फाइजर र एनबायोटेकको खोपलाई स्वीकृत गर्ने नगर्ने बारे छलफल गर्ने आशा गरिएको छ ।
करिब चार लाख डोज आज शुक्रबार बिहान नारिता अन्तर्राष्ट्रिय विमानस्थलमा आइपुगेको हो ।
जापानका प्रधानमन्त्री योशीहिदे सुगाले अर्को हप्ताको बीचबाट खोपहरू लगाउन सुरु हुने बताएका छन् । जानकारी अनुसार पहिलो चरणमा करिब २०,००० स्वास्थ्यकर्मीलाई खोप दिइनेछ ।
यस वर्षको मध्यसम्म जापानको सम्पूर्ण जनससंख्याका लागि पर्याप्त खोप आपूर्ति गर्ने सरकारको लक्ष्य रहेको छ ।
