काठमाडौं – भारतले अनुदानमा दिएको १० लाख डोज कोरोनाविरुद्धको खोप सुरुमै फ्रन्टलाइनमा खटिनेलाई लगाइने भएको छ। स्वास्थ्य तथा जनसंख्या मन्त्री हृदयश त्रिपाठीले यसबारेमा बुधबार जानकारी दिएका हुन् ।
भारतमा सिरम इन्स्टिच्युटले उत्पादन गरेको १० लाख डोज कोभिसिल्ड खोप बिहीबार काठमाडौं आइपुग्ने भएको हो । मन्त्री त्रिपाठीका अनुसार यो खोप पहिलो चरणमा फ्रन्टलाइनमा खटिनेहरुलाई लगाइने छ । ‘नेपालमा ७२ प्रतिशत जनसंख्या खोपका लागि उपयुक्त रहेको ठहर हामीले गरेका छौं’, उनले भने, ‘भारतबाट बिहीबार आउने यो खोप हाम्रो जनसंख्याको ३ प्रतिशत ‘फ्रन्टलाइन’का योद्धाहरुलाई लगाइनेछ ।’
त्रिपाठीका अनुसार यो खोप देशभरका स्वास्थ्यकर्मी, सुरक्षाकर्मी, शव व्यवस्थापनकर्मी, चिकित्साकर्मी, सफाइकर्मी र एम्बुलेन्स चालकलाई लगाइनेछ । त्यसबाट बाँकी भएको खोप उच्च जोखिमका अन्य समुदायलाई क्रमश: लगाउँदै जाने उनले बताएका छन् ।
‘कोभिडविरूद्धको संघर्षका पहिलो योद्धालाई पहिलो प्राथमिकता दिएर खोप दिइनेछ । कानुनी र आर्थिक सबै प्रक्रिया पूरा भइसकेको छ’, उनले भने, ‘भारत सरकारको सहयोग र हाम्रो निरन्तर प्रयासले १० लाख डोज खोप आयो । प्रथम चरणको खोप योद्धाहरुलाई पुर्याउने कोसिस हुनेछ । त्यसपछि बाँकी खोप जोखिम रहेका जनसंख्यालाई दिइनेछ ।’
