टोकियो – जापानको स्वास्थ्य, श्रम तथा कल्याण मन्त्रालयले शिजुओकामा तीन जनामा बेलायतमा भेटिएको कोरोनाभाइरसको नयाँ भेरिएन्टको संक्रमण भएको पुष्टि गरेको छ । मन्त्रालयका अनुसार नयाँ प्रकारको कोरोना संक्रमण पोजेटिभ देखिनेमा २ जना महिला र १ जना पुरुष छन् । योसँगै जापानमा भाइरसको नयाँ प्रजातिबाट संक्रमित हुनेको कुल संख्या ४५ पुगेको छ ।
संक्रमित तीनै जना बेलायतको भ्रमण नगरेको र विदेशबाट आएका कसैसँग कुनै सम्पर्कमा नरहेकोले समुदाय स्तरमा संक्रमण भएको हुन सक्ने अनुमान गरिएको छ । यसरी जापान भित्रै बेलायतको नयाँ भेरिएन्ट भेटिएको यो पहिलो केस हो । संक्रमणको स्रोत पत्ता लगाउन अधिकारीहरूले अनुसन्धान गरिरहेका छन् ।
नयाँ प्रकारको कोरोना देखिएका ३ जनामा सामान्य लक्षण रहेको मन्त्रालयले जानकारी दिएको छ ।
बेलायतमा फैलिरहेको नयाँ प्रजातिको भाइरस अहिले विद्यमान भाइरसभन्दा सात गुणा बढी संक्रामक रहेको पाइएको जनाइएको छ ।
अहिले नै यो यो कति घातक छ भन्ने अझै पुष्टि भएको छैन । तथापि यो शीघ्र फैलिने भएको हुँदा नियन्त्रण गर्न गाह्रो हुने बेलायती अधिकारीले बताएका छन् ।
