टोकियो – जापानमा पुनः कोरोना भाइरसका संक्रमित बढ्न थालेका छन् । जापानको भर्खरको कोरोनाभाइरसको वृद्धि र गर्मीमा छाएको छालमा केहि फरक भेटिएको छ । नोभेम्बरको सुरुदेखि नै संक्रमित हुनेको संख्या सँगै गम्भीर बिरामीको संख्यामा वृद्धि हुँदा वर्तमान अवस्था अलि चिन्ताजनक देखिएको हो । साथै हालको छालमा विशेष गरी ८० वर्ष नाघेका वृद्धवृद्धा कोरोनाको गम्भीर शिकार बनिरहेका छन् ।
जापान विश्वको सबैभन्दा धेरै वृद्ध जनसङख्या रहेको देश हो ।
स्वास्थ्य मन्त्रालयको तथ्यांक अनुसार देशमा अहिलेसम्म कोरोना संक्रमणबाट दुई हजार भन्दा धेरैको मृत्यु भएको छ र यो संख्यामा १४ प्रतिशत ८० वा ८० नाघेका वृद्धवृद्धाको निधन भएको छ ।
यसरी कोरोना संक्रमण, यसबाट हुने मृत्यु र गम्भीर बिरामीको संख्या बढिरहेका बेला आउँदो जाडो जापानका लागि थप चुनौतीपूर्ण र खतरानाक बन्ने चेतावनी विज्ञहरूले दिएका छन् । जाडो महीनामा कोरोना बढ्ने भएकाले स्वास्थ्य उपचार र हेरचाहको राम्रो बन्दोबस्त नमिलाए ठूलो क्षति निम्तिन सक्ने भएकाले सरकारले त्यसो हुन नदिन तयारी थाल्नुपर्ने उनीहरूको भनाइ छ ।
मुख्य रूपमा जापानका चार महानगरीय क्षेत्र – साप्पोरो, आइची, ओसाका र टोकियो कोरोनाबाट बढी प्रभावित बनेका छन् । यी क्षेत्रहरुमा गम्भीर कोरोनाका बिरामीकाे उपचार गर्न ताेकिएका अस्पतालमा बेड अभाव हुने परिस्थितिमा छन् ।
स्वास्थ्यमन्त्री नोरिहिसा तामुराले कोरोनाका गम्भीर बिरामीको संख्या झण्डै ५०० पुगेको जानकारी दिएका छन् ।
