टोकियो– आर्थिक पुनःनिर्माण मन्त्री निशिमुरा यासुतोशीले बिहिवार संचालन बन्द गर्ने व्यवसायीहरुका लागि प्रिफेक्चर सरकारले के कस्ता कदम चाल्न सक्छन् भन्ने निर्देशिका जारी गरेका छन् ।
स्थानीय सरकारले व्यवसाय बन्द गर्न आग्रह गरिरहेको भएपनि केही पाचिन्को पार्लरहरुले अनुरोध मानेका छैनन् । शुरुको अनुरोध कानूनी कारणबाहेक नमान्नेहरुका लागि कठोर खालको अनुरोध वा निर्देशन ल्याउन अधिकार गभर्नरहरुलाई दिइएको निर्देशिकामा भनिएको छ ।
त्यस्ता चेतावनी पाउने व्यवसायको नाम र ठेगाना अनलाइन वा अन्य माध्यमहरुमा सार्वजनिक गरिनेछ । त्यस्ता कम्पनी वा पसलहरुमा मानिसहरुलाई जानबाट निरुत्साहित गर्न यस्तो गर्न लागिएको हो ।
मानव–मानव बीचको सम्पर्क ८० प्रतिशत घटाउन भनिएको भएपनि केही ठाउँमा मानिसहरुको भिड धेरै रहेको निशिमुराको भनाइ छ ।
यस्तो समस्या समाधान गर्न क्षेत्रअनुसार केन्द्र सरकारले गभर्नरहरुलाई मद्दत गर्ने उनको भनाइ छ । नजिकिदैं गरेको सार्वजनिक बिदाका दिनहरुमा घरभित्रै बस्न समेत उनले आम जनतालाई आग्रह गरेका छन् ।***