काठमाडौँ – आज शुक्रबार बिहानसम्म कोरोना भाइरसको संक्रमणबाट विश्वभरमा ज्यान गुमाउनेको संख्या १ लाख ९० हजार ४०१ पुगेको छ ।
त्यस्तै २४ घण्टाको अवधिमा ८३ हजार ८२९ जना नयाँ संक्रमित थपिएका छन् । यो सँगै संक्रमितको संख्या २७ लाख १५ हजार ६१४ पुगेको छ ।
संक्रमितमध्ये ७ लाख ४५ हजार ४५ जना उपचारपछि निको भएर घर फर्किएका छन् ।
आज बिहानसम्मको तथ्यांकअनुसार जापानमा कोरोना भाइरसको संक्रमितहरुको संख्या (डाइमण्ड प्रिन्सेस क्रुजका ७१२ जना संक्रमित यात्रुहरुसहित) १३ हजार १९२ जना पुगेको छ ।
पछिल्लो तथ्यांक अनुसार भाइरसले (डाइमण्ड प्रिन्सेस क्रुजको १३ यात्रुसहित) ३४१ जनाको ज्यान लिएको छ ।
जापानमा शुरुदेखि नै टोकियोमा बढी संक्रमित देखिएका छन् । टोकियोमा मात्र संक्रमितहरुको संख्या ३ हजार ५७२ जना पुगेको जनाइएको छ ।
टोकियोपछि सबैभन्दा बढी ओसाकामा १४१५ जना संक्रमित छन् ।
यसैगरी यस प्रकोपबाट खानागावा (८७५), चिवा (७७०), साइतमा (७५९), ह्योगो (५८०) र फुकुओका (५७९) पनि बढी प्रभावित रहेका छन् ।
मन्त्रालयका अनुसार जापानमा ३ हजार ५३ जना निको भएर घर फर्किएका छन् भने संक्रमित व्यक्तिहरु मध्ये २६३ जनाको अवस्था चिन्ताजनक छ ।
यसैबीच जापानमा कोरोना संक्रमित नेपालीको संख्या ३ जना पुगेको छ । टोकियोमा २ जनामा कोरोना भाइरसको संक्रमण भेटिएको छ भने ईबाराकी केनमा १ जनामा संक्रमण पुष्टि भएको छ ।
नेपालमा बिहीबार ३ जनामा कोरोना पुष्टि भएसँगै कोरोना संक्रमितको संख्या ४८ पुगेको छ ।
उपचारत सबैको अवस्था सामान्य रहेको स्वास्थ्य मन्त्रालयले जनाएको छ ।
