काठमाडाैं – नेपाल क्रिकेट संघ (क्यान)को अध्यक्षमा चतुरबहादुर चन्द विजयी भएका छन् । शनिबार सम्पन्न क्यानको चुनावमा उनी आफ्ना प्रतिस्पर्धी विनयराज पाण्डेलाई पराजित गर्दै विजयी भएका हुन् ।
जम्मा ५९ मतदाता रहेको क्यानमा चन्दले ४४ र पाण्डेले १५ मत प्राप्त गरेका छन् । त्यस्तै उपाध्यक्षमा राजबाबु श्रेष्ठले ४१, सचिवमा अशोक प्याकुरेलले ४२ कोषध्यक्षमा रोशनबहादुर सिंहले ४५ मत प्राप्त गर्दै विजयी बने । उनीहरुका प्रतिस्पर्धी डेण्डु लामाले १२, विनोद मैनालीले १५, उपेन्द्र भट्टराईले १२ मत प्राप्त गरेका छन् ।
१७ सदस्यका लागि भएको निर्वाचनमा चन्दको प्यानल नै विजयी भएको हो । विजयी सदस्यहरुमा अर्जुन पौडेल ३६, धीरेन्द्र साउद ४२, सञ्जय सिंह ३४, माधवकुमार कर्मचार्य ३५, करन क्षेत्री ३० मतसहित विजयी भएका छन् । क्यान फुकुवाका लागि महत्वपूर्ण मानिएको यो निर्वाचनमा प्रगतिशील समूहलाई पराजित गर्दै लोकतान्त्रिक समूहको प्यानलै विजयी भएको हो ।
