नेपाली अम्पायरले अब मलेसियामा क्रिकेट खेलाउन पाउने

काठमाडाैं – मलेसियामा हुने घरेलु क्रिकेट प्रतिष्पर्धा अब नेपाली अम्पायर र स्कोररले सञ्चालन गर्न पाउने छन् । मलेसिया र नेपालका अम्पायर र स्कोररहरुका प्रतिनिधि संघबीच हालै भएको दुईपक्षीय सम्झौता अनुसार यस्तो अवसर मिलेको हो ।

यससँगै मलेसियाका अम्पायर र स्कोररहरु पनि नेपालमा आएर यहाँका घरेलु क्रिकेट सञ्चालन गर्नसक्ने छन् । ‘क्रिकेट अम्पायर्स एण्ड स्कोरर्स एसोशिएसन अफ नेपाल’ र ‘मलेसियन क्रिकेट एशोसिएसन’बीच साझेदारी सम्झौताको रुपमा यस्तो भएको हो ।

नेपालको तर्फबाट एशोसिएसनका अध्यक्ष बुद्धिबहादुर प्रधान र मलेसियाको तर्फबाट समकक्षी महिन्दा बालिपुरमले सम्झौतामा हस्ताक्षर गरेका थिए । सम्झौतापछि उनीहरुले दुई देशबीचको ऐतिहासिक सम्बन्ध कोट्याउँदै अब दुबै देशका खेलाडी र अम्पायरका लागि अवसर मिलेको प्रतिक्रिया दिए ।