काठमाडौं – दोस्रो संस्करणको पोखरा प्रिमियर लिग (पीपीएल) कार्तिक अन्तिम साताबाट सुरु हुने भएको छ । आयोजक क्वीन्स इभेन्ट मेनेजमेन्टले सोमबार प्रेस विज्ञप्ति जारी गर्दै पीएपीएल कार्तिक २६ देखि मंसिर ७ गतेसम्म आयोजना हुने गरी मिति घोषणा गरेको हो ।
प्रतियोगिता पोखरा रंगशालास्थित क्रिकेट मैदानमा आयोजना हुनेछ । ‘पहिलो संस्करणको सफलताले दोस्रो संस्करण आयोजना गर्न प्रेरणा मिलेको छ,’ क्वीन्स इभेन्ट मेनेजमेन्टका कार्यकारी निर्देशक छुम्बी लामाले हस्ताक्षेर गरेको विज्ञप्तिमा उल्लेख छ । यतिबेला राष्ट्रिय क्रिकेट टोलीका ३५ जना खेलाडी १३ औं दक्षिण एसियाली खेलकुद (साग) प्रतियोगिताको बन्द प्रशिक्षणमा रहेका छन् ।
बन्द प्रशिक्षणमा रहेका खेलाडीलाई फ्रेन्चाईज लिग खेल्नका लागि खुला गर्ने वा नगर्नेबारे मुख्य प्रशिक्षक र कप्तानसँग छलफल भइरहेको कार्यकारी निर्देशक लामाले बताएका छन् । लामाले अहिले पोखरा क्रिकेट मैदानको मर्मत कार्य भइरहेको बताएका छन् । सागमा महिला क्रिकेट पोखरामा हुने बताइएको छ भने अहिले मैदान निर्माणको काम भइरहेको छ ।
