काठमाडाैं – विश्व फुटबलमा एउटा बहस सधै भइरन्छ- क्रिष्टियानो रोनाल्डो र लियोनेल मेसी को उत्कृष्ट खेलाडी? बहस अझै सकिएको छैन । दुबै खेलाडीको प्रदर्शन आ-आफ्नो ठाउँमा उच्च छ ।
कोही मेसीलाई उत्कृष्ट मान्छन् त कोही रोनाल्डोलाई । फुटबल पण्डितहरु भन्छन्–रोनाल्डो र मेसी दुबै उत्कृष्ट खेलाडी हुन् । को उत्कृष्ट ? भन्ने बहस गर्नु पर्दैन । क्रिष्टियानो रोनाल्डो च्याम्पियन्स लिगका सर्वाधिक गोलकर्ता हुन् । मेसीले स्पेनिस क्लब बार्सिलोनालाई सबै उपाधि जिताइसकेका छन् । बार्सिलोनाका उनी सर्वाधिक गोलकर्ता पनि हुन् ।
मेसी र रोनाल्डोले पाँच–पाँच पटक बालोन डि’अरको उपाधि जितेका छन् । यसबाट पनि भन्न सकिन्छ-मेसी र रोनाल्डो अहिलेका सबैभन्दा उत्कृष्ट खेलाडी हुन् । बहस अझै हुनेछ- रोनाल्डो र मेसी को उत्कृष्ट भनेर । क्रिष्टियानो रोनाल्डोले हालै एक अन्तर्वार्तामा आफू मेसीभन्दा फरक रहेको दाबी गरेका छन् । उनले फरक क्लबबाट च्याम्पियन्स लिगको उपाधि जितेको र च्याम्पियन्स लिगमा ६ सिजन सर्वाधिक गोलकर्ता भएको भन्दै आफू मेसीभन्दा फरक रहेको तर्क गरेका छन् ।
रोनाल्डोले इंग्लिश क्लब म्यानचेष्टर युनाइटेड र रियल मड्रिडबाट पाँच पटक च्याम्पियन्स लिग जितेका जितेका छन् । हाल रोनाल्डो इटालियन क्लब युभेन्ट्समा आबद्ध छन्। त्यहाँबाट पनि च्याम्पियन्स लिगको उपाधि उचाल्न चाहन्छन् । यद्यपी, अन्तवार्तामा रोनाल्डोले मेसी एक उत्कृष्ट खेलाडी भएको बताएका छन् । ‘मेसी एक उत्कृष्ट खेलाडी हुन्, म जस्तै । जसलाई बालोन डि’अरको उपाधि जितेका कारणमात्रै हामी सम्झिन्नौं । लामो समयदेखि उनले माथिल्लो स्तरको खेल खेलिरहेका छन्, प्रत्येक वर्ष मजस्तै,’ उनले भने ।
‘जिदान एक प्रतिभाशाली प्रशिक्षक हुन्’
रोनाल्डोले जिनेदिन जिदान विश्वकै एक प्रतिभाशाली प्रशिक्षण भएको बताएका छन् । ‘म जिदानलाई धैर सम्मान गर्छु, एउटा व्यक्तिका रुपमा,’ रोनाल्डोले अन्तर्वार्तामा भनेका छन्,‘उनीप्रति मेरो सम्मान थियो नै, अझ प्रशिक्षक बनेपछि सम्मान झन् बढ्यो । जिदानको म साच्चिकै ठूलो प्रशंसक हुँ ।’ उनले जिदानले आफूलाई क्लबमा रहँदा विशेष महसुस गराएको पनि बताएका छन् ।
