काठमाडाैं – फ्रेन्च लिग वान च्याम्प्यिन पेरिस सेन्ट जर्मन (पीएसजी) ले उत्कृष्ट कमब्याक गर्दै सुपर कप फाइनलमा रेन्नेसलाई २–१ ले पराजित गर्दै सिजनको सुखद सुरुवात गरेको छ । तर, जितको टिम सेलिब्रेसन र फोटो सेसन भने सुखद हुन सकेन ।
किलियन एमबाप्पे र एन्जेल डि मारियाको गोलमा उपाधि जितेको पीएसजीका लागि चोटका कारण मैदान बाहिर रहेका नेयमारले भने योगदान दिन सकेनन् । तर, स्क्वाडमा नाम भएका कारण उनले मेडल भने पाएका थिए । मेडल पाएपछि मार्को भेराटीले नेयमारलाई तानेर मैदानमा भइरहेको टिम सेलिब्रेसनमा सहभागी हुन लगेका थिए ।
तर, जितमा आफ्नो प्रत्यक्ष योगदान केही नभएका कारण नेयमार सेलिब्रेसनमा सरिक हुन अप्ठ्यारो मान्दै छेउमा बसेर खुसी साँट्दै थिए । सेलिब्रेसनका दौरान भेराटी अन्य खेलाडीको हुलमुलमा मिसिएपछि छेउमा उभिएर खुशी मनाउँदै गरेका नेयमारलाई एम्बाप्पेले हुत्याएर समूहबाहिर पु-याइदिए । सामान्यतयः अनुहारमा मुस्कान हुने एम्बाप्पे त्यसबेला रुष्ट देखिन्थे । सामाजिक सञ्जालमा सार्वजनिक भएको भिडियोमा एम्बाप्पेलाई नेमारले टिमका सबैसँग खुशी मनाएकोमा चित्त नबुझेर बाहिर हुत्याएको देखिन्छ ।
नेयमार जारी ट्रान्सफर मार्केटमा पीएसजी छाडेर आफ्नो पूर्वक्लब बार्सिलोना जान चाहन्छन् । उनको यो ढिपीले पीएसजीको ड्रेसिङ रुमलाई दुई भागमा विभाजन गरेको तथ्य मैदानमा स्पष्ट रुपमा देखिएको थियो । केही समय पहिले एम्बाप्पेले एक अन्र्तवार्तामा नेयमार पीएसजीमै बसुन् भन्ने आफ्नो चाहना रहेको खुलासा गरेका थिए । तर, पीएसजीका खेलाडी तथा अधिकारीको आग्रहका बावजुद नेयमार बार्सिलोना जानेमा अडिग छन् । पीएसजी पनि नेयमारबिना उत्कृष्ट प्रदर्शनलाई जारी राख्न प्रयासरत देखिन्छ ।
पछिल्लो केही समय चोटका कारण मैदान बाहिरै रहेका नेयमारको अनुपस्थितिमा पीएसजीले घरेलु प्रतियोगितामा उत्कृष्ट प्रदर्शन गरिरहेको छ । पीएसजीले नेमार बिना रेन्नेसविरुद्ध जित निकाल्दै लगातार ७ पटक सुपर कप जित्दै लियोनको रेकर्ड तोडेको थियो । यसअघि लियोनले २००२ देखि २००६ सम्म लगातार ६ पटक सुपरकप जित्दै रेकर्ड बनाएका थियो ।
