काठमाडाैं – कोरियामा काम गर्न जाने नेपाली कामदारले कम्प्युटर प्रणालीबाट भाषा परीक्षा दिनुपर्ने भएको छ । यो व्यवस्था सन् २०२० देखि लागू हुनेछ ।
रोजगार अनुमति प्रणाली (ईपीएस) भाषा परिक्षामार्फत दक्षिण कोरिया जान नेपाली कामदारले हाल लेख्दै आएको कागजमा आधारित परीक्षा (पीबीटी) प्रणालीको विकल्प र व्यववस्थित बनाउन कम्प्युटरमा आधारित परीक्षा (सीबीटि) ल्याउने तयारी भइरहेको वैदेशिक रोजगार इपीएस शाखाले जानकारी दिएको छ । नेपाल सरकारले सन् २००८ देखि सरकारी स्तरमा श्रम सम्झौता गरी कोरियालाई नेपाली कामदार रोजगारीमा आपूर्ति गदै आएको छ ।
कोरियाको मानव संसाधन विकास केन्द्र (एचआरडी)ले आगामी वर्षदेखि (सीबीटी) मार्फत परीक्षा गराउने तयारी थाल्न इपीएस शाखालाई पत्राचारसमेत गरेको छ । सीबीटिमार्फत परिक्षा गराउन शाखाले आवश्यक पुर्वाधार निर्माणको काम धमाधाम गरिरहेको वैदेशिक रोजगार इपीएस शाखाका प्रमुख कृष्ण खनालले जानकारी दिनुभयाे । उहाँका अनुसार दक्षिण कोरिया सरकारले विदेशी कामदार आपूर्ति गदै आएका देशमा यो वर्षदेखि कम्प्युटरमा आधारित परीक्षा सिवीटीमार्फत परीक्षा लिन शुरु गरेको छ ।
सन् २००८ यता ईपीएस भाषा परीक्षा पास गरेर करिब ५७ हजार नेपाली रोजगारीका लागि कोरिया पुगेको ईपीएस शाखाले जानकारी दिएको छ । जसमा महिलाको संख्या ५ हजार छ । नेपालबाट भाषा परीक्षा उत्तीर्ण गरेर वार्षीक ७ हजारको हाराहारीमा नेपाली कामदार रोजगारीका लागि कोरिया जाने गरेका छन् । कोरियामा राम्रो कमाइ हुने भएका कारण नेपाली युवाको आकर्षण पनि बढदै गएको छ ।
