टोकियो – पश्चिम जापानमा बिहिबार भिषण आँधी आएको छ । भिषण बाढीबाट गत महिना नराम्रोसँग प्रभावित इलाका लगायत अन्य क्षेत्रमा यसपटक पनि भारी वर्षा र पहिरो जान सक्ने चेतावनी मौसम विज्ञान विभागले दिएको छ ।
ग्रीनवीच समयअनुसार बुधबार २३०० बजे ‘सिमारोन’ नामक यो आँधी गोटो द्वीपबाट करिब १८९ किलोमिटर दक्षिणपश्चिममा २१६ किलोमिटर प्रतिघण्टाको बेगले आएको छ । यस आँधीको कारण भूस्खलन हुने आशङ्का गरिएको छ । यो आँधी शुक्रबार बिहान देशको उत्तरी भागतिर पुग्ने छ ।
आँधीसँगै भिषण वर्षा हुने सम्भावना रहेकोले मध्य जापानका केही भागमा शुक्रबार मध्याह्नसम्म ३१ इन्च (८०० मिलिमिटर) सम्म वर्षा हुने मौसमसम्बन्धी सरकारी अधिकारीहरुले बताएका छन् ।
भारी वर्षा हुने सम्भावना रहेका इलाकामा गत महिनाको बाढी प्रभावित इलाका समेत रहेका छन् । गत जुलाईको बाढी र पहिरोमा परेर २०० भन्दा बढी व्यक्तिको मृत्यु भएको थियो । ***
