टोकियो – बाग्लुङको गल्कोट क्षेत्रबाट जापान पुगेका प्रवासी नेपालीको सहयोगमा रामेछाप जिल्लामा भूकम्पबाट क्षतिग्रस्त विद्यालयको पुनःनिर्माण गरिएको छ । गल्कोट समाज जापानको सहयोगमा रामेछापको सुनापति गाउँपालिका–१ स्थित जागृत आधारभूत विद्यालयको नयाँ भवन निर्माण गरिएको हो ।
२५ लाखको लागतमा निर्मित चार कोठे पक्की भवनको आइतबार गलकोट समाज जापानका अध्यक्ष नरबहादुर थापाले उद्घाटन गर्नुभयो । उद्घाटनपछि उक्त भवन समाजका तर्फबाट विद्यालय व्यवस्थापन समितिलाई हस्तान्तरण गरिएको छ । सामाजिक उत्तरदायित्व सम्झेर भूकम्प प्रभावित ठाउँमा पुगी विद्यालय भवन निर्माण गरिएको समाजका अध्यक्ष थापाले बताउनुभयो । अंग्रेजी नयाँ वर्षमा जापानका विभिन्न शहरमा गरिएको सांगीतिक कार्यक्रमबाट जुटेको रकम विद्यालय बनाउन खर्च गरिएको उहाँको भनाइ छ । 
भवन नभएपछि बालबालिकाले खुला चौरमा पढ्न बाध्य भएको अवस्था थाहा पाएपछि समाजले गत वर्षको असारदेखि भवन निर्माण शुरु गरेको थियो । भूकम्प प्रभावित विद्यालयको पुनःनिर्माण गरेर समाजले प्रशसंनीय कार्य गरेको विद्यालय व्यवस्थापन समितिका अध्यक्ष बेलप्रसाद गौतमले बताउनुभयो ।
समाजले बाग्लुङ जिल्लाका केही स्वास्थ्य संस्थालाई एम्बुलेन्स लगायत स्वास्थ्य उपकरण समेत सहयोग गरेको छ । शैक्षिक क्षेत्र तथा प्राकृतिक प्रकोपका बेला समाजले आर्थिक लगायत विभिन्न सहयोग गर्दै आएको छ । गलकोट समाज अहिले जापानलगायत अन्य १२ विदेशी मुलुकमा स्थापना भइसकेको छ ।
