काठमाडौँ – प्रधानमन्त्री पुष्पकमल दाहालले नेपाली सङ्गीत र कलालाई विश्वमा फैलाउन विभिन्न मुलुकमा रहेका राजदूतावासमा यस क्षेत्रका प्रतिष्ठित व्यक्तिलाई पनि राख्न पहल गरिने बताउनुभएको छ ।
नेपाल सङ्गीत तथा नाट्य प्रज्ञा–प्रतिष्ठानको नवौँं प्राज्ञसभालाई आज सम्बोधन गर्दै प्रतिष्ठानका संरक्षक प्रधानमन्त्रीले राजदूतावासमा सैनिक एवम् श्रम सहचारी रहे जस्तै गरी सङ्गीत क्षेत्रका प्रतिनिधिलाई राख्ने पहल गर्ने विश्वास दिलाउनुभएको हो । उहाँले भन्नुभयो, ‘नेपाल र नेपालीको गौरवलाई विश्वमा चिनाउनका लागि सङ्गीत एवम् नाट्य क्षेत्र गतिशील हुनुपर्छ, त्यसका लागि संरक्षकका तवरबाट म सक्दो पहल गर्छु ।’
प्रतिष्ठानको प्रवद्र्धन र विकासका लागि आफ्नै भवन हुने व्यवस्था मिलाउन प्रधानमन्त्री दाहालले छिट्टै पहल गरिने विश्वास दिलाउनुभयो । तराई, पहाड र हिमालभित्र रहेको विविधता र मौलिकतालाई जीवन्त एवम् विश्वभर फैलाउने जिम्मा पाएको प्रतिष्ठानको भूमिकालाई अझै विस्तार गरेर लैजानुपर्नेमा जोड दिनुभयो ।
प्रतिष्ठानका कुलपति सरुभक्तले परिवर्तनको संवाहकका रूपमा रहेको नाट्य प्रज्ञा–प्रतिष्ठानको भौतिक संरचना निर्माणका लागि सहयोग गरिदिन माग गर्नुभयो भने उपकुलपति शम्भुजित बाँस्कोटाले विश्वका विभिन्न मुलुकमा सरकारीस्तरमा हुने भ्रमण टोलीमा सङ्गीतकर्मीलाई पनि समावेश गराउन माग गर्नुभयो ।
