टोकियो – नेपाली महिलाहरूको महान् चाड हरितालिका तीजको अवसरमा स्याङ्जा समाज जापानले ‘तिज धमाका २०१६’ कार्यक्रम गर्ने भएको छ । 
‘स्वास्थ्य सामग्री वितरण तथा भैपरी आउने आकस्मिक कोष निर्माणार्थ’ भन्ने मूल नाराका साथमा समाजले उक्त कार्यक्रमको आयोजना गरेको हो । जापानका प्रमुख ३ सहरमा हुने कार्यक्रममा नेपालका चर्चित लोकदोहोरी कलाकारहरू खुमन अधिकारी, राधिका हमाल र जमुना राना मगर सँगै जापानका ख्यातीप्राप्त कलाकारको पनि प्रस्तुति रहने आयोजकले जनाएको छ ।
जापानका मुख्य शहरहरुमध्ये फुकोओकामा सेप्टेम्बर ३ तारिक, टोकियोमा ४ तारिक र नागोयामा १० तारिक कार्यक्रम हुनेछ । परोपकारी कामलाई सहयोग पनि हुने र नेपालका ख्याति प्राप्त कलाकारका साथमा नाच्ने, गाउने, रमाउँदै महान् पर्व मनाउने अवसर भएकोले जापानवासी महिलाहरूलाई कार्यक्रममा सहभागी भएर परोपकारी कामलाई सहयोग पुर्याउन आयोजकले अनुरोध पनि गरेको छ ।
स्याङ्जा समाज जापानले हरेक वर्ष यस्ता मनोरन्जनका कार्यहरुसहित परोपकारी कामहरू पनि गर्दै आइरहेको छ । स्याङ्जा जिल्लाबाट जापानमा कार्यरतहरुको साझा संस्था ‘स्याङ्जा समाज जापान’ सामाजिक क्षेत्रमा पनि सक्रिय छ ।
