काठमाडौँ – विवादका बाबजुत महाधिवेशन उद्घाटन भएको एक सातापछि नेपाल विद्यार्थी सङ्घको ११ महाधिवेशनको निर्वाचन कार्यक्रम सार्वजनिक भएको छ ।
विवादबीच पार्टी केन्द्रीय सदस्य प्रकाशशरण महत नेतृत्वको निर्देशक समितिले शनिवार राति प्रतिनिधिको टुंगो लगाएसँगै निर्वाचन कार्यक्रम सार्वजनिक भएको हो । नेविसंघ केन्द्रीय निर्वाचन समितिका संयोजक भरतप्रसाद खरेलले निर्वाचन कार्यक्रम सार्वजनिक गर्नुभएको हो । महाधिवेशन प्रतिनिधि ३ हजार ४ सय मात्र रहने गरी गत मंगलबार सहमति जनाएपनि पार्टीको आधिकारिक साइटमार्फत सर्वाजनिक सूचीमा भने ४ सय भन्दा बढीको नाम रहेको छ । नेविसंघ केन्द्रीय निर्वाचन समितिका संयोजक भरत खरेलको हस्ताक्षरमा सार्वजनिक गरिएको प्रतिनिधि सूचीमा ३ हजार ७ सय ६० प्रतिनिधिको नाम छ । 
विभिन्न समूहबीच भागवण्डा हुँदा प्रतिनिधिको नामावली बढेको बुझिएको छ । प्रकाशित कार्यतालिका अनुसार साउन २९ गते साँझ महाधिवेशन प्रतिनिधिहरूको नामावली प्रकाशन गर्नेदेखि ३२ गते बिहान ७ बजेदेखि मतदान गर्नेसम्मको कार्यक्रम रहेका छन् । हिजो नै मतदाताको अन्तिम नामावली सार्वजनिक गर्ने र शनिवार मनोनयन दर्ता गर्ने भनिएपनि विवाद नमिलेपछि त्यो सम्भव नभएको हो । आफूलाई लोकतान्त्रिक पार्टी भनेर चिनाउने काँग्रेसको विद्यार्थी सङ्गठनमा भद्रगोल देखिएको हो । महाधिवेशन उद्घाटन एक हप्तासम्म पनि प्रतिनिधि सुची नआएपछि अधिकाशं मतदाताहरु घर फर्किसकेका छन् ।
यसैबिच नेपाल विद्यार्थी सङ्घको ११ औँ महाधिवेशनका प्रतिनिधिहरूलाई आज बिहान ९ बजेदेखि मतदाता परिचयपत्र, झोला लगायतका सामग्री पार्टीको केन्द्रीय कार्यालय, बिपी स्मृतिभवनबाट वितरण गरिने भएको छ ।
निर्वाचन कार्यक्रम
महाधिवेशन प्रतिनिधिहरुको नामावली प्रकाशन : २०७३ श्रावण २९ गते साँझ ९ः०० वजे ।
उम्मेदवारको मनोनयन दर्ता : २०७३ श्रावण ३० गते दिनको ३ः०० वजेदेखि साझ ६ः०० वजेसम्म ।
उम्मेदवारको पहिलो नामावली प्रकाशन : २०७३ श्रावण ३० गते वेलुकि ७ः३० बजे ।
उम्मेदवारको नाम वर्णानुक्रम अनुसार भए नभएकोमा दावी संशोधन माग गर्ने समय : २०७३ श्रावण ३१ गते विहान १०ः०० बजेदेखि १०ः३० बजेसम्म ।
दोस्रो उम्मेदवारको नामावली प्रकाशन २०७३ श्रावण ३१ ग्ते विहान ११ः३० बजे ।
उम्मेदवारको मनोनयन पत्रमा दावी विरोध : २०७३ श्रावण ३१ गते दिउसो १२ः३० बजेदेखि ३ः३० बजेसम्म ।
दावी विरोध उपर जाँचवुझ पछिको उम्मेदवारीको नामावली प्रकाशन : २०७३ श्रावण ३० गते दिनको १ः०० बजे ।
उम्मेदवारीको नाम फिर्ता : २०७३ श्रावण ३१ गते दिनको १ः३० बजेदेखि ५ः३० वजेसम्म ।
उम्मेदवारको अन्तिम नामावली प्रकाशन : २०७३ श्रावण ३१ गते साँझ ६ः०० बजे ।
मतदान : २०७३ श्रावण ३२ गते विहान ०७ः०० बजेदेखि साँझ ७ः०० बजेसम्म ।
नेपाली कांग्रेस केन्द्रीय कार्यालय वी.पी.नगरमा हुनेछ ।
मतगणना : मतदान समाप्त भएपछि लगत्तै गरिनेछ ।
