काठमाडौँ – अख्तियार दुरुपयोग अनुसन्धान आयोगले डा. गोविन्द केसी मानसिक रूपमा अस्वस्थ्य भएको भन्दै उपचारको व्यवस्था मिलाउन सरकारलाई आग्रह गरेको छ ।
डा. केसीले अख्तियार प्रमुख कार्कीलाई महाअभियोग लगाउन माग गर्दै अनसनमा बस्ने जनाएपछि आइतबार साँझ अख्तियारले प्रेस विज्ञप्ति जारी गर्दै डा. केसीको मानसिक स्वास्थ्य ठिक नरहेको, उनी भ्रष्टहरुको माखे साङ्लोमा जेलिएको भन्दै केसीको उपचार व्यवस्था मिलाउन सरकारलाई भनेको हो । साथै डा. केसी आफ्नो न्युनतम् आचरण र जिम्मेवारीबाट समेत विमुख रहेकोले उनका क्रियाकलापलाई अख्तियारले नियालीरहेको पनि प्रवक्ता कृष्णहरि पुष्करले जारी गरेको विज्ञप्तिमा उल्लेख छ ।
‘भष्ट्रचार, अनाचार एवं सबैखाले बिससंगति, विरुद्धको महाअभियानमा क्रियाशील आयोगका प्रमुख आयुक्त र आयुक्तहरुप्रती लक्षित डा.केसीको माग छुद्रता, अराजकता र अस्वस्थ मानसिकताको घोतक हो भन्ने आयोगको ठम्याई हो । ’ विज्ञप्तिमा जनाईएको छ । अख्तियार प्रमुखमाथि लगाइको आरोप प्रमाणित गर्न चुनौती दिदैं आरोप प्रमाणित भए अख्तियार प्रमुखले सन्यास लिने पनि जनाएको छ । 
त्रिवि शिक्षण अस्पतालका चिकित्सक डा. केसीले आइतबार नै पत्रकार सम्मेलन गरी अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीमाथि महाअभियोग लगाउनु पर्नेसहित विभिन्न माग अघि सार्दै आमरण अनसनको घोषणा गरेका थिए ।
केसीले अख्तियार प्रमुखमाथि आफू र आफ्ना मान्छेहरूको निहित स्वार्थका लागि मेडिकल शिक्षाको क्षेत्रमा हस्तक्षेप गरेको आरोप लगाएका थिए ।
