काठमाडौँ – आयोजक फ्रान्स युरोकप फुटबल प्रतियोगिताको नकआउट चरणमा प्रवेश गरेको छ । समूह ए अन्तर्गत दोस्रो चरणको खेलमा गएराति अल्बानियालाई २–० ले हराउँदै फ्रान्सले प्रि–क्वाटरफाइनलमा स्थान सुरक्षित गरेको हो ।
फ्रान्स युरोकप फुटबल प्रतियोगिताको नकआउट चरणमा प्रवेश गर्ने पहिलो टोली बनेको छ । खेल सकिन एक मिनेट बाँकी रहँदासम्म बराबरी भएको अवस्थामा फ्रान्सका एन्टोनियो ग्रेजम्यान र दिमित्री पायटले एक–एक गोल गर्दै टोलीलाई जित दिलाएका हुन् । जितसँगै दुई खेलबाट ६ अंक जोडेको फ्रान्स अन्तिम १६ मा छानियो । यो समूहमा २ खेलबाट ४ अंक जोडेको स्विट्जरल्याण्ड दोस्रो स्थानमा छ । 
गएराति नै भएको अर्को खेलमा स्विट्जरल्याण्डले रोमानियासँग १–१ गोलको बराबरी खेल्यो । खेलको १८ औं मिनेटमा पाएको पेनाल्टीलाई गोलमा बदल्दै रोमानियाका बोग्दान स्टान्चुले टोलीलाई अग्रता दिएपनि दोस्रो हाफको ५७ औं मिनेटमा स्विस टोलीका अद्मीर मेहेमेदीले एक गोल फर्काउदै खेल बराबरी गरेका हुन् ।
युरो कप फुटबलअन्तर्गत समूह बी को खेलमा स्लोभाकियाले रुसलाई २–१ ले हराएको छ । खेलमा स्लोभाकियाका लागि भ्लादिमिर वाईज र मारेक ह्याम्सीकले एक–एक गोल गरे भने रुसका डेनिस ग्लुसाकोभले एक गोल फर्काए । 
प्रतियोगिता अन्तर्गत आज साँझ पौने ७ बजे इङ्ल्यान्ड र वेल्स भिड्नेछन् । आजै बेलुकी समूह सी का दुई खेल पनि हुनेछन् । नेपाली समय अनुसार बेलुकी पौने १० बजे हुने खेलमा युक्रेन र नर्दन आयरल्याण्ड र राति पौने १ बजे जर्मनीले पोल्याण्डसँग खेल्नेछ । -एजेन्सी
