फराकिलो र सुविधा सम्पन्न कार्यालय खोज्दै एमाले

काठमाडौं । अहिलेको भन्दा फराकिलो र सुविधा सम्पन्न केन्द्रीय कार्यालय खोज्न नेकपा (एमाले)ले गत वर्षदेखि प्रयास गरेपनि हालसम्म उपयुक्त ठाउँ र कार्यालय भेट्न सकेको छैन ।

बल्खुस्थितको केन्द्रीय कार्यालय साँघुरो भएकाले अर्को उपयुक्त स्थानमा कार्यालय स्थानान्तरण गर्न एमालेको अघिल्लो नेतृत्वले पोलिटब्युरो सदस्य विष्णु रिमालको संयोजकत्वमा समिति बनाएर काम थालेको थियो ।

नयाँ कार्यालय खोज्ने क्रमसँगै बल्खुमा बनाउन लागिएको थप नयाँ भवन निर्माण कार्य पनि रोकिएको थियो । एमाले केन्द्रीय कार्यालयका सचिव कृष्णगोपाल श्रेष्ठले हालसम्म काठमाडौं उपत्यकाको चक्रपथभित्र उपयुक्त नयाँ स्थान र भवन फेला नपरेको तर खोजी कार्य जारी रहेको जानकारी दिनुभयो ।

पार्टीको सदस्यता वृद्धि र राजनीतिमा भूमिका बढेपछि बल्खुको कार्यालयमा चियापान, भेटघाट र आन्तरिक भेला तथा पार्किङका लागि साँघुरो हुने गरेको नेताहरुले बताएका छन् ।