काठमाडौं- अमेरिका भ्रमणमा रहेका एकीकृत नेकपा माओवादीका अध्यक्ष पुष्पकमल दाहाल ‘प्रचण्ड’ आज स्वदेश फर्किँदै हुनुहुन्छ ।गत १९ गते नेपालको शान्ति प्रकृया र लुम्बिनीको विकासमा राष्ट्रसंघ महासचिव वान की मुनलगायत अन्तर्राष्ट्रिय समुदायको सहयोग जुटाउन प्रचण्ड अमेरिका जानु भएको थियो ।
अमेरिका बसाईका क्रममा राष्ट्रसंघ महासचिव मुन लगायत विभिन्न अन्तर्राष्ट्रिय गैरसरकारी क्षेत्रका अधिकारीसँग प्रचण्ड नेतृत्वको टोलीले महत्वपूर्ण भेटवार्ता गरेको थियो । प्रचण्ड नेतृत्वको टोली आइतबार दिउँसो साढे १२ बजे काठमाडौं आईपुग्ने कार्यक्रम रहेको प्रचण्डका स्वकीय सचिव समीर दाहालले जानकारी दिनुभयो ।
प्रचण्डले आफ्नो भ्रमणबारे विमानस्थलमा पत्रकार सम्मेलन गरेर जानकारी दिने कार्यक्रम रहेको पनि उहाँले बताउनु भयो । टोलीमा लुम्बिनीलाई अन्तर्राष्ट्रिय शान्ति शहर निर्माण गर्ने गुरुयोजना बनाउन गठित समितिका सदस्य एवं काँग्रेस नेता डा. मीनेन्द्र रिजाल, मनोज बहादुर श्रेष्ठ, प्रचण्डका स्वकीय सचिव समिर दाहाल र प्रकाश दाहाल सहभागी छन् ।
