टोकियो – श्रीमती हत्या गरेको अभियोगमा पूर्व स्थानीय सभासद्लाई जेल सजाय सुनाइएको छ । जापानको नागानो जिल्ला अदालतले नागानो प्रिफेक्चरस्थित आफ्नै घरमा पत्नीको हत्या गरेको अभियोगमा पूर्व स्थानीय सभासद् दाइसुके मारुयामालाई १९ वर्षको जेल सजाय सुनाएको हो ।
५० वर्षीय मारुयामाले अप्रिल २०२३ सम्म सभासद्का रूपमा आफ्नो कार्यकाल पूरा गरेका थिए । उनले नागानो जिल्ला अदालतमा चलेको मुद्दामा आफू दोषी नभएको बताएका थिए । तर दाबी साँचो हुने कुनै प्रमाण जुटाउन नसकेपछि उनी दोषी ठहर भएका हुन् ।
अभियोजन पक्षले मारुयामालाई २० वर्षको जेल सजाय माग गर्दै उनले पूर्व प्रेम सम्बन्ध पुनः सुरु गर्ने चाहनाका कारण यो अपराध गरेको दाबी गरेका थिए । अभियोगपत्रका अनुसार मारुयामाले २०२१ सेप्टेम्बर २९ को राति करिब १ः४४ देखि ३ः०४ बजेबीच शियोजिरीस्थित आफ्नै घरमा पत्नीको श्वास रोकेर हत्या गरेको खुलेको छ ।
