समाचार सुन्नुहोस :
काठमाडौँ – भक्तपुरको बालकोटमा भएको हत्या घटनामा खोटाङका कुलप्रसाद आचार्य र उनका छोरा प्रविणको मृत्युपछि प्रहरीले कुलप्रसादकै जेठो छोरा मिलन आचार्यलाई पक्राउ गरेको छ। उपत्यका अपराध अनुसन्धान कार्यालयको टोलीले मंगलबार बिहान उनलाई नियन्त्रणमा लिएको हो।
खोटाङको दिक्तेल रुपाकोटमझुवागढी नगरपालिका–१ का ५६ वर्षीय कुलप्रसाद र २२ वर्षीय कान्छो छोरा प्रविण सोमबार मृत फेला परेका थिए। मिलन र प्रविण भक्तपुरको बालकोटस्थित एक घरमा कोठा भाडामा लिएर बसिरहेका थिए। केही दिनअघि मात्र कुलप्रसाद छोराहरूसँग भेट्न खोटाङबाट आएका थिए।
अनुसन्धानका क्रममा सीसीटीभी फुटेजमा मिलन शनिबार राति कोठाबाट बाहिर निस्किएको देखिएको थियो। प्रारम्भिक अनुसन्धानमा उनले हत्या स्वीकार गरेको उपत्यका अपराध अनुसन्धान कार्यालयका एक अधिकारीले जानकारी दिएका छन्। अहिले उनको विषयमा थप सोधपुछ भइरहेको प्रहरीले जनाएको छ।
