समाचार सुन्नुहोस :
काठमाडौँ – महोत्तरीका जिल्लामा एक हप्तादेखि बढ्दो गर्मीका कारण धेरै विद्यालय र क्याम्पसहरू बन्द भएका छन्। बिहानैदेखि चर्को घाम र तातो हावा चलेपछि चार स्थानीय तहहरूले चार दिनका लागि विद्यालयहरू बन्द गर्ने निर्णय गरेका छन् र अरू तहहरू पनि बन्दको तयारीमा छन्।
सदरमुकाम जलेश्वर नगरपालिकामा तापक्रम ४० देखि ४४ डिग्री सेल्सियस पुगेपछि नगर प्रमुख सुरेश साह सोनारले नगरका २९ सामुदायिक र धार्मिक विद्यालयहरूलाई चार दिनको बिदा दिएका छन्। यस्तै, मनरासिस्वा नगरपालिकाले पनि सबै २३ सामुदायिक, धार्मिक विद्यालयहरू र मदरसाहरूलाई शनिबारसम्म बिदा दिएको छ।
महोत्तरी गाउँपालिकाले आजदेखि शनिबारसम्मका लागि सबै विद्यालयहरू बन्द गर्ने घोषणा गरेको छ भने बर्दिबास नगरपालिकाले पनि चार दिनका लागि पठनपाठन स्थगित गरेको नगर प्रमुख प्रल्हादकुमार क्षेत्रीले जानकारी दिए। जलेश्वरस्थित रामनन्दन विशेश्वर महेन्द्र क्याम्पसमा पनि पठनपाठन स्थगित भएको छ। गर्मीले गर्दा जलेश्वरको प्रादेशिक अस्पतालमा ज्वरो, रुघाखोकी, झाडापखाला र टाइफाइडका बिरामीहरूको संख्या बढेको छ।
