समाचार सुन्नुहोस :
काठमाडौँ – अष्ट्रेलियाको सिड्नीबाट २१ दिनदेखि हराइरहेका काभ्रेका सुभाष बोलखेको शव साङसुसी क्षेत्रको समुद्री तटमा भेटिएको छ। क्यानबेरास्थित नेपाली दूतावासले एनएसडब्लु प्रहरीले शव फेला परेको पुष्टि गरेको जानकारी दिएको छ।
सुभाषले घरमै मोबाइल र अन्य कागजात छाडेर हराएका थिए। उनी अन्तिम पटक जुलाई २७ मा बेक्स्ली क्षेत्रमा देखिएका थिए र त्यसपछि बेपत्ता भएका थिए। नेपाली दूतावासको पहलमा सिड्नी प्रहरीले सुभाषको हराएको जानकारी सार्वजनिक गरेको थियो। १० महिनाअघि अध्ययनका लागि अष्ट्रेलिया गएका सुभाष निरन्तर परिवारसँग सम्पर्कमा थिए। साथी विवाहका लागि नेपाल गएको समयमा उनी अचानक सम्पर्कविहीन भएका थिए।
उनको शव नेपाल ल्याउन प्रक्रिया चलिरहेको छ, जसमा करिब १५ दिन लाग्ने अनुमान छ। शव ल्याउन १० हजार डलर खर्च हुने भएकाले रकम संकलनका लागि पहल भइरहेको छ।
