समाचार सुन्नुहोस :
काठमाडौँ – त्रिभुवन अन्तर्राष्ट्रिय विमानस्थलमा प्रहरीले भन्सार छलिएको सुनसहित चार जनालाई पक्राउ गरेको छ। पक्राउ परेका व्यक्तिहरूमा मोरङका ३१ वर्षीय सरोज कोइराला, रौतहटका २४ वर्षीय मोहम्मद इन्तेयाज आलम, सप्तरीका २१ वर्षीय मोहम्मद अरमान र ३७ वर्षीय ज्याउदिन मिया रहेका छन्।
विमानस्थल सुरक्षा कार्यालयका डीआईजी रामदत्त जोशीका अनुसार, सरोज कोइराला र मोहम्मद इन्तेयाज आलमको साथबाट ६९ ग्राम ९९ मिलिग्राम सुन र मोहम्मद अरमान र ज्याउदिन मियाको साथबाट ५० ग्राम सुन बरामद भएको हो।
कतार एयरको उडानबाट काठमाडौं आएका सरोज कोइराला भन्सार छलिएको सुन मोहम्मद इन्तेयाज आलमलाई हस्तान्तरण गर्ने क्रममा पक्राउ परेका हुन्। यस्तै, दोहाबाट आएका ज्याउदिन मिया भन्सार छलिएको सुन मोहम्मद अरमानलाई दिने क्रममा पक्राउ परेका हुन्। प्रहरीले पक्राउ परेकाहरूलाई आवश्यक कानूनी कारबाहीको लागि विमानस्थल भन्सार कार्यालयमा बुझाएको छ।
