काठमाडौँ – जारी टी-२० विश्वकप अन्तर्गत आयरल्याण्डले इङल्याण्डलाई पराजित गरेको छ । बर्षाले प्रभावित भएको खेलमा आयरल्याण्डले इङल्याण्डलाई डक वर्थ लुइस नियम अनुसार ५ रनले पराजित गरेको हो । आयरल्याण्डले दिएको १५८ रनको लक्ष्य पछाएको इङल्याण्डले १४.३ ओभरमा ५ विकेट गुमाउदै १०५ रन बनाएको थियो । बर्षाले खेल रोकिदा इङल्याण्ड डक वर्थ लुइस नियम अनुसार ५ रन पछि पर्यो र आयरल्याण्डले जित हासिल गर्यो ।
यसअघि टस हारेर पहिला ब्याटिंग गरेको आयरल्याण्डले १९.२ ओभरमा अलआउट हुदै १५७ रन बनाएको थियो । आयरल्याण्डका लागि कप्तान एन्डी बालब्रिनेले सर्बाधिक ६२ रन बनाएका थिए । त्यस्तै लोर्कान टक्करले ३४, कर्टिस काम्परले १८, पाउल स्टिरलिंगले १४ र ग्यारेथ डेलानीले १२ रन बनाएका थिए ।
त्यसैगरी इङल्याण्डका बलर मार्क वूड र लियाम लिभिङ स्टोनले ३-३ विकेट लिए भने साम कुरानले २ र बेन स्टोक्सले एक विकेट लिएका थिए । यो जितपछि सुपर १२ को समुह १ मा आयरल्याण्डको २ खेलमा २ अंक भएको छ भने इङल्याण्डको पनि २ खेलमा २ अंक रहेको छ ।
