काठमाडौँ — नवौं राष्ट्रिय खेलकुद प्रतियोगिताअन्तर्गत बुद्धिचाल प्रतियोगिता गोरखामा सुरु भएको छ । युवा तथा खेलकुद मन्त्रालय तथा राष्ट्रिय खेलकुद परिषद्को आयोजना र गण्डकी प्रदेशको सहआयोजनामा बिहीबारबाट गोरखा क्याम्पसमा प्रतियोगिता सुरु भएको हो ।
प्रतियोगितामा ११ टिमका ६६ जनाको सहभागिता रहेको आयोजक टिमका सदस्य मनोलिसा खम्बुले बताइन् । सात प्रदेश, एनआरएनए, नेपाल प्रहरी, सशस्त्र प्रहरी र नेपाली सेना गरी ११ टिमबाट तीन पुरुष र तीन महिलाले प्रतियोगितामा सहभागिता जनाएका छन् ।
बुद्धिचाल प्रतियोगिताअन्तर्गत ६ वटा इभेन्ट हुने प्रमुख निर्णायक यासिर खुम्बुले बताए । क्लासिकल, ब्लिच र र्यापिड गरी तीन चरणका खेल हुने उनले बताए । बिहीबार क्लसिकल प्रतिस्पर्धा हुने खुम्बुले जानकारी दिए । खेल ९ राउन्डको लिग खेल हुने उनले बताए ।
‘फ्री डेको रुलअनुसार खेल सञ्चालन हुन्छ,’ उनले भने । बिहीबार जिल्ला समन्वय समिति गोरखाका प्रमुख मोहनबहादुर थापाले एक कार्यक्रमका बिच प्रतियोगिताको उद्घाटन गरे । गोरखा क्याम्पसमा बिहीबारबाट सुरु भएको बुद्धिचाल प्रतियोगिता कात्तिक २ गतेबाट सञ्चालन हुने छ ।
