काठमाडौँ – क्रिस्टियानो रोनाल्डोको कीर्तिमानी गोलमा म्यानचेस्टर युनाइटेडले पूनरागमन जित निकालेको छ । गएराति भएको इङ्लिस प्रिमियर लिगमा युनाइटेडले एभर्टनमाथि २–१ को पूनरागमन जित निकालेको हो ।
युनाइटेडको जितमा रोनाल्डो र एन्टोनीले समान एक–एक गोल गरे । एभर्टनका एलेक्स इओवीको गोल सान्त्वना बन्यो । योसँगै रोनाल्डोले व्यवसायिक खेल करिअरमा कीर्तिमानी ७ सय गोल पूरा गरेका छन् । उनले ९४५ खेलमा ७०० गोलको आँकडा पूरा गरेका हुन् ।
रोनाल्डोले स्पोर्टिङ सिपीबाट ३१ खेलमा ५ गोल, म्यानचेस्टर युनाइटेडबाट २९२ खेलमा ११८ गोल, रियल म्याड्रिडबाट ४३८ खेलमा ४५० गोल र युभेन्ट्सबाट १३४ खेलमा १०१ गोल गरेका छन् । गत सिजन युनाइटेड फर्किएका रोनाल्डोले यस सिजनसहित ४८ खेलमा २६ गोल गरेका छन् ।
८१औं मिनेटमा मार्कुस रासफोर्डले गोल गरेपनि उक्त गोलको मुभमा फउल भएपछि गोलले मान्यता पाएन । त्यसपछि थप गोल निस्कन नसक्दा युनाइटेड विजयी हुन सफल भयो । यस जितसँगै युनाइटेड ८ खेलबाट १५ अंक जोडेर पाँचौं स्थानमा उक्लिएको छ । पराजित एभर्टन १० अंक जोडेर १२औं स्थानमा रहेको छ ।
