काठमाडौं – अर्थमन्त्री जनार्दन शर्माले नेपालको अर्थतन्त्र श्रीलंकासँग तुलना गर्दै जनतालाई आतंकित गर्ने प्रवृत्तिलाई अन्त्य गर्नुपर्ने बताएका छन् । काठमाडौंमा आयोजित नेपालको वित्त र अर्थ व्यवस्थाबारे राष्ट्रिय सम्मेलनलाई सम्बोधन गर्दै अर्थमन्त्री शर्माले नेपालको अर्थतन्त्र श्रीलंकासँग तुलना हुनै नसक्ने दाबी गरे । उनले नेपालको अर्थतन्त्र सुधारका लागि भइरहेको चिन्तालाई सलाम गर्नसक्नु पर्ने बताएका छन् ।
‘नेपाल र श्रीलंकाको तुलना नै हुन सक्दैन । हाम्रो ऋण कुरा हेर्नुस्, उत्पादन क्षेत्र हेर्नुस्, विदेशी लगानी हेर्नुस् । ऋण सहायता हेर्नुस्’, अर्थमन्त्री शर्माको भनाइ छ । उनले तुलना हुनै नसक्ने कुरामा तुलना गरेर आम जनतालाई आतंकित पार्ने काम भइरहेकोमा असन्तुष्टि जनाए ।
‘तुलना नहुने कुरामा तुलना गर्दै आज जनतालाई आतंकित पार्ने काम एकथरीले गरेका छन् त्यो गलत छ, त्यसको खण्डन गर्नुपर्छ’, शर्माले भने, ‘अर्थतन्त्रमा फेरि समस्याहरु छन् त्यो हामीले पनि भनिरहेका छौ । त्यसलाई बदल्नु पर्छ । तर कतिपयलाई रहर छ श्रीलंका बनाउने । तिनको सपना पुरा हुँदैन ।’
उनले अर्थतन्त्रबारे दुई तरिकाबाट टिप्पणी भइरहेको र एकाथरीले श्रीलंकाकै हालतमा पुर्याउनु पर्छ भनिरहेकोमा त्यसको विरोध गर्नुपर्ने बताएका छन् । ‘सुधार्नु पर्छ भनेर चिन्ता व्यक्त भएका पनि छन् यो चिन्ता गर्नेलाई सलाम गर्नुपर्छ । त्यसकारण यहाँ श्रीलंका हुनसक्दैन । नेपाललाई श्रीलंकासँग तुलना गर्दै जनतालाई आतंकित गर्ने प्रवृत्तिलाई अन्त्य गरौ’, मन्त्री शर्माको अपिल छ । उनले अर्थतन्त्र सुधारका लागि बहस गर्न आवश्यक रहेको पनि बताए ।
मन्त्री शर्माले नेपालमा डलर सिञ्चिति साढे ६ महिनाका लागि रहेको भन्दै योबाट तल झर्न नदिने बताउँदै विलासिताका सामानहरु आयातमा घटाउनुपर्ने बताए । उनले स्वदेशी उत्पादन आलु स्याउ जस्ता सामग्री आयात नगर्दा पनि हुने तर त्यसतर्फ ध्यान नदिएको तर्फ ध्यान जानुपर्ने बताए ।
