काठमाडौं – त्रिभुवन विमानस्थलको आन्तरिक टर्मिनलभित्र प्रवेशमा कडाइ गरिने भएको छ । अब हवाइ यात्राको लागि प्रिन्ट गरिएको टिकट वा डिजिटल टिकट आवश्यक पर्ने भएको हो ।
त्रिभुवन विमानस्थलका प्रवक्ता टेकनाथ सिटौलाका अनुसार एसएमएसमा प्राप्त भएको पीएनआर नम्बर भएको टिकट मात्रै देखाएर भने टर्मिनलभित्र प्रवेश पाइने छैन । सोमबार त्रिभुवन विमानस्थल प्रशासन, सुरक्षा निकाय तथा विमान कम्पनीबीच भएको बैठकले एसएमएसमा प्राप्त हुने टिकटको पीएनआर नम्बरका आधार टर्मिनल प्रवेश नदिने निर्णय गरेको उनले बताए ।
काठमाडौं बाहिरका विमानस्थलमा भने यो नियम लागू गरिएको छैन । ‘प्रिन्टेड वा प्रिन्टेडमा हुने सबै विवरण भएको डिजिटल टिकट भए प्रवेशमा समस्या हुँदैन,’ उनले भने, ‘पीएनआर नम्बर मात्रैको आधारमा भने अब प्रवेश गर्न पाइँदैन । विभिन्न डिजिटल वालेट वा मोबाइल बैंकिङबाट टिकट खरिद गरेको भए त्यसको पीडीएफ चाहियो ।’
