बुद्धको ७२ सिटे जहाजले तुम्लिङटारमा उडान भर्ने

काठमाडौं – निजी क्षेत्रको हवाई सेवा कम्पनी बुद्ध एयरले अब संखुवासभाको तुम्लिङटारमा आफ्नो एटिआर-७२ जहाजबाट उडान भर्ने भएको छ । बुद्धको ७२ सिटे जहाजले शुक्रबार तुम्लिङटार विमानस्थलमा सफलतापूर्वक परीक्षण उडान गरेको छ ।

काठमाडौंबाट परीक्षण उडानका लागि क्याप्टेन रञ्जनकुमार शर्मा नेतृत्वको टोलीले ७२ सिटे जहाज लिएर पुगेको थियो । उक्त जहाजमा नागरिक उड्डयन प्राधिकरणका पदाधिकारीहरु भोलाप्रसाद गुरागाईँ, डेपुटी डाइरेक्टर जनरल, क्याप्टेन दधिराम निरौला, इन्सपेक्टर, फ्लाइट अपरेसन टोली तुम्लिङटार पुगेका थिए ।

एटिआर-७२ जहाजको सञ्चालन खर्च कम हुने र यात्रु पनि बढी बोक्ने भएकाले हवाई भाडा पनि सस्तो हुने विश्वास बुद्धले लिएको छ ।