काठमाडौं – इङ्गलिस प्रिमियर लिग फुटबलमा साउथह्याम्पटनले स्वान्सी सिटीलाई १-० ले हराएको छ ।
स्वान्सी सिटीको मैदानमा गएराती भएको खेलमा साउथह्याम्पटनलाई महत्वपूर्ण जित दिलाउन ७२ औं मिनेटमा ईटालयन खेलाडी मानोलो ग्याबियादिनीले गरेको गोल निर्णायक बन्यो ।
जितसँगै साउथह्याम्पटनले प्रिमियर लिगमै जोगिने संभावना बलियो पारेको छ । उसको यो जितले वेष्ट ब्रोमको भने रेलिगेशन पक्का भएको छ ।
लिगमा एक खेल खेल्न बाँकी छँदै वेष्ट ब्रोम रेलिगेशनमा पर्दै प्रिमियर डिभिजनबाट दोस्रो श्रेणीको च्याम्पियनसिपमा झरेको हो ।
तालिकाको पुछारमा रहेको स्टोक सिटी यसअघि नैं रेलिगेशनमा परिसकेको छ ।
रेलिगेशनमा पर्ने अर्को टोलीको टुंगो भने लिगको अन्तिम चरणका खेलहरु पछि लाग्नेछन् ।
१८ औ स्थानको स्वान्सी सिटी रेलिगेशनमा पर्ने प्रबल संभावना छ । १७ औं स्थानको हडर्सफिल्ड टाउन पनि रेलीगेशनको खतरामा रहेको छ ।