काठमाडौं – जन्मेदेखि २८ दिन सम्मका नवजात शिशुको निशुल्क उपचार कार्यक्रम प्रभावकारी रुपले अघि बढाइने सरकारले जनाएको छ । नवजात शिशुको मृत्युदर घटाउने उद्देश्यका साथ गत वर्षदेखि सुरु गरिएको सो कार्यक्रमलाई यस वर्षदेखि प्रभावकारी रुपमा अघि बढाइने सरकारको तयारी छ ।
कार्यक्रमका लागि सरकारले यसवर्ष ११ करोड ३५ लाख बजेट निकासा गरेको स्वास्थ्य सेवा विभाग अन्तर्गत बाल स्वास्थ्य महाशाखाको नवजात शिशु तथा बालरोग एकीकृत व्यवस्थापन कार्यक्रम प्रमुख पर्शुराम श्रेष्ठले बताउनुभयो । सो कार्यक्रमका लागि २१ करोडको माग गरिएपनि गतवर्ष बजेट फ्रिज भएका कारण यसवर्ष पहिलो चरणमा ५० प्रतिशत बजेट मात्र प्राप्त भएको श्रेष्ठले जानकारी दिनुभयो ।
कार्यक्रमका लागि आवश्यकता अनुसार बजेटको माग गरिने महाशाखाले जनाएको छ । कार्यक्रम अन्तर्गत जन्मेदेखि २८ दिन सम्मका नवजात शिशुको सबै खाले उपचार सरकारले निशुल्क रुपमा गर्दै आएको छ । पाँच वर्ष मुनिका बालबालिकाको मृत्युदरमा सुधार आएपनि नवजात शिशुको मृत्युदरमा सुधार आउन नसक्दा जन्मेदेखि २८ दिन सम्मका नवजात शिशुको निशुल्क उपचार कार्यक्रम लागु गरिएको हो ।
आवश्यक पूर्वाधार तथा जनशक्तिको अभावमा कार्यक्रम प्रभावकारी रुपले सञ्चालन हुन नसकेको श्रेष्ठको भनाई छ । सो कार्यक्रम मुलुकभरका जिल्ला अस्पताल देखि माथिका अस्पतालमा लागु गरिएको हो ।
