काठमाडौं – चिकित्सा शिक्षा र सेवामा सुधारको माग गर्दै ११ औं पटक अनसनरत डा. गोविन्द केसीको मागप्रति सरोकारवालाले सकारात्मक धारणा राखे पनि सहमति भने हुन सकेको छैन ।
शिक्षण अस्पतालका प्राध्यापक डाक्टर केसी / चिकित्सा शिक्षा विधेयक पारित हुनुपर्ने माग सहित अनसन बसेको आज १४ औं दिन भइसक्दा पनि सरकारी पक्षले समस्या समाधानका लागि ठोस पहल लिएको छैन ।
सरकारी पक्षबाट आश्वासन मात्र आएको डा. केसीका प्रतिनिधिले बताएका छन् । हिजो दुबै पक्षबीच वार्ता भएपनि सहमति हुन सकेन । अस्ति शुक्रबार प्रधानमन्त्री शेर बहादुर देउवाले आफ्नै पहलमा सरोकारवाला पक्षसंग छलफल गर्नु भएको थियो ।
माथेमा कार्यदलको प्रतिवेदन प्रतिकुल नहुने गरि चिकित्सा शिक्षा ऐन पारित गर्ने प्रधानमन्त्री शेरबहादुर देउवाले आश्वासन दिनु भएको छ । यद्यपि सहमति भने जुटन सकेको छैन ।
अहिलेसम्म वार्ताको कुनै छाँटकाँट नदेखिएको डा. केसी पक्षका प्रतिनिधि डा. सुमन सापकोटाले बताउनुभयो । चिकित्सा शिक्षा सम्बन्धी विधेयक संसदबाट तत्काल पारित गरिनुपर्ने लगायत ११ बुँदे माग गर्दै डा. केसी अनशनमा बस्नु भएको हो ।
उहाँको स्वास्थ्य अबस्था पछिल्लो पटक नाजुक बन्दै गएको छ ।
