डडेल्धुरा – सहिद भीमदत्त पन्तको ६४ औँ स्मृति दिवस सोमबार विभिन्न कार्यक्रम गरी मनाईंदै छ । किसान योद्धाका रुपमा चिनिने पन्तको वि.स. २०१० साउन १७ गते हत्या गरिएको थियो ।
उहाँको सम्झनामा सहिद भीमदत्त स्मृति प्रतिष्ठानले दिवस मनाउँदै आएको छ । स्मृति दिवसको अवसरमा सोमबार बिहान डडेल्धुरा बागबजार स्थित पन्तको शालिकमा माल्यार्पण गरिएको छ ।
यस्तै दिउँसो १२ बजे छात्रवृत्ति वितरण गरिने र उत्कृष्ट किसानलाई अभिनन्दन गरिने सहिद भीमदत्त स्मृति प्रतिष्ठानका वरिष्ठ उपाध्यक्ष उमेशप्रसाद भट्टले जानकारी दिनुभएको छ । प्रतिष्ठानले लामो समयदेखि सहिद पन्तको स्मृति दिवस मनाउँदै आएको भएपनि गएको वर्षको फागुन १९ गते प्रधानमन्त्री केपी शर्मा ओली नेतृत्वको सरकारले औपचारिक रुपमा भीमदत्त पन्तलाई सहिद घोषणा गरेको थियो ।
‘कि त जोत हलो, कि त छोड थलो, होइन भने अब छैन भलो’ भन्दै सशक्त रुपमा किसान आन्दोलन गरेका भीमदत्त पन्त किसान नेताका रुपमा परिचित छन् । भीमदत्त पन्तको जन्म डडेलधुराको अहिलेको अमरगढी नगरपालिका कारीगाउँमा वि.सं. १९८३ साल मंसिर १० गते भएको थियो ।
