काठमाडौँ – करिब १६ वर्ष पहिले व्यावसायिक रूपमा हिट भएको फिल्म ‘दर्पण छायाँ’ अब नयाँ कथा अनि परिवेशमा बन्ने भएको छ । सोमबार एक कार्यक्रमका बिच निर्देशक तुलसी घिमिरेले ‘दर्पण छायाँ २’ फिल्मको घोषणा गर्नुभएको हो ।
फिल्म घोषणा कार्यक्रममा बोल्दै निर्देशक घिमिरेले फिल्मलाई ‘दर्पण छायाँ’ को सिक्वेलको रूपमा भने नलिन आग्रह गर्दै त्यो बेलाको कथा र प्रस्तुति समय सापेक्ष थियो तर अहिले समय बदलिएको भन्दै नाम सापटी लिईए पनि सिक्वेल भन्न नमिल्ने बताउनुभयो । कार्यक्रमको सुरुवातमा शंख फुकेर स्वस्ती वाचन गरिएको थियो । फिल्मको १० प्रतिशत छायाँकन अमेरिकामा भईसकेको पनि बताइएको छ । 
एक हप्ता भित्रै फ्लोरमा जाने यस फिल्ममा पुराना अनुहार भने कोही दोहोरिएका छैनन् । डा. लोपसाङ लामाको प्रस्तुति तथा सबु गडाल कार्की र रवि कार्कीको निर्माणमा बन्ने फिल्ममा पुष्प खड्का, साहारा कार्की र श्रद्धा प्रसाईले फिल्ममा मुख्य भूमिका निर्वाह गर्ने छन् । 
कार्यक्रममा चलचित्रका मुख्य कलाकारले ‘दर्पणछायाँ’ मा समावेश ‘लहनाले जुरायो कि’ को साथमा ‘दर्पणछायाँ २’ मा समावेश ‘दर्पणमा छायाँ कति राम्रो ?’ बोलको गीतमा नृत्य समेत प्रस्तुत गरेका थिए । जुलाईको दोस्रो हप्तासम्म छायाँकन सकाएर यो वर्ष नै रिलिज गर्ने योजना स्वरूप काम अघि बढ्ने निर्माण पक्षले जनाएको छ ।
