काठमाडौँ – नयाँ शक्ति नेपालको पार्टी घोषणासँगै सोमबारबाट सुरु भएको छलफल सत्रमा विवाद भएको छ । पार्टीको सिद्धान्त तथा राजनीतिक प्रतिवेदनका विषयमा विवाद देखिएको हो ।
पार्टीको कार्यदिशा बाम राख्ने कि गैरबाम राखेर अघि बढ्ने भन्नेमा पनि नयाँ शक्तिका प्रतिनिधिहरुमा फरकफरक धारणा राखेका हुन् । विभिन्न १३ वटा समूह विभाजन गरेर सञ्चालित छलफल सत्रका सहभागिहरुबीच कम्युनिस्ट पृष्ठमूमिबाट आएका प्रतिनिधिहरूले वाम नै राखेर जानुपर्नेमा जोड दिएका छन् । तर, कम्युनिस्ट पृष्ठभूमिभन्दा बाहिर बिभिन्न पेसा तथा व्यवसाय अँगालेर आएका प्रतिनिधिहरूले भने गैरवाम नाम राखेर जानुपर्नेमा जोड दिएका छन् ।
छलफल सत्रमा राजनीतिक प्रतिवेदन प्रस्तुत गर्दै संयोजक डा. बाबुराम भट्टराईले तत्कालका लागि बाम लोकतान्त्रिक चरित्रको सिद्धान्त अवलम्बन गरेर गए पनि आगामी वर्षभित्र उपयुक्त विकल्प खोजेर परिवर्तन गर्न सकिने बताउनुभएको थियो । नयाँ शक्तिका केन्द्रीय परिषद सदस्य केशव अर्यालले सिद्धान्तका विषयमा कसरी अगाडि बढ्ने भनेर पनि प्रतिनिधिहरुबीच छलफल भइरहेको बताउनुभयो ।
यता, संघीय गणतान्त्रिक पार्टीका अध्यक्ष पर्शुराम तामाङले पूतुत गरेको अलग्गै राजनीतिक प्रतिवेदनमा पनि बहुराष्ट्रिय जनतन्त्रको सिद्धान्त अगाडि सारेको आजको राजधानी दैनिकमा खबर छ ।
